ग्रामीण भागातील श्रावणावर कोरोनाचे सावट; पण सकारात्मक राहून घेता येईल आध्यात्मिक व नैसर्गिक आनंद ! 

कुर्डुवाडी (सोलापूर) : श्रावण महिना म्हणजे व्रतवैकल्यांचा महिना, पावसात मनसोक्त भिजत, निसर्गाच्या सान्निध्यात फिरत आनंद घेण्याचा महिना. यंदा यावर कोरोनाचे सावट असले तरी सकारात्मक विचार करून, योग्य नियोजन करून आध्यात्मिक व नैसर्गिक आनंद घेता येईल, असा सल्ला तज्ज्ञांकडून दिला जात आहे. 

हेही वाचा : सकाळ इम्पॅक्‍ट : ओबीसींच्या मागण्या मुख्यमंत्र्यांना मान्य; ओबीसी-व्हीजेएनटी संघर्ष समितीबरोबरील बैठकीत निर्णय; वाचा सविस्तर... 

श्रावण महिन्यात सर्वजण विशेषतः महिला व्रतवैकल्ये करतात. सोमवारी श्री महादेवाच्या मंदिरात दर्शनाला रांग लागलेली असते. नागपंचमीच्या आधीपासून परिसरातील महिला, मुली एकत्र येत फेर धरणे, झोके खेळणे असे विविध खेळ खेळतात. अनेक ठिकाणी असलेल्या श्री महादेव मंदिरांच्या परिसराला तर यात्रेचे स्वरूप प्राप्त झालेले असते. भाऊ बहिणीकडे किंवा बहीण भावाकडे जाऊन राखी बांधून राखी पौर्णिमा साजरी केली जाते. श्रीकृष्ण जन्माष्टमी तर धूमधडाक्‍यात साजरी केली जाते. यंदाच्या वर्षी हे सर्व सण साजरे करताना मर्यादा पडणार असल्या तरी सर्व कुटुंबीय घरातच एकत्र येऊन हे सण आनंदात उत्साहात साजरे करू शकतात. 

हेही वाचा : धक्कादायक : वाळू माफियांकडून तहसीलदारावर गाडी घालून जिवे मारण्याचा प्रयत्न 

श्रावण महिन्यात पावसात भिजत डोंगरदऱ्यात फिरण्याकडे तरुणांचा ओढा असतो. उंचावरून पडणाऱ्या धबधब्याखाली भिजण्याची मजा काही औरच असते. दरवर्षी तरुणाई श्रावण महिन्याची आतुरतेने वाट पाहात असते. मस्त पावसात भिजत फिरल्यानंतर कडकडीत भूक लागते. त्या वेळी गरम भाकरी, पिठले, ठेचा, भुईमुगाच्या भाजलेल्या शेंगा, विस्तवावर भाजलेले मक्‍याचे कणीस मिळाले तर आनंद गगनात मावेनासा होतो. या सर्व खाद्य पदार्थांवर उभा-आडवा हात मारला जातो. परंतु, यंदा या सर्वांवर देखील मर्यादा आल्या आहेत. परंतु सकारात्मक विचार करत जर आपल्या घराजवळील एखाद्या शेतात, निसर्गाच्या सान्निध्यात स्वतःच्या कुटुंबीयांसमवेत खाद्यपदार्थ तयार करून नेले तर आस्वाद घेता येईल. 

कुर्डुवाडीची रहिवासी मयूर पाटील म्हणाले, मी दरवर्षी श्रावण महिन्यात पुणे, सातारा, कोल्हापूर, रामलिंग, सौताडा यापैकी किमान एका ठिकाणी तरी मित्रांसमवेत डोंगरदऱ्यात फिरावयास जातोच. परंतु, सध्या इतर जिल्ह्यांत फिरावयास जाणे मला शक्‍य वाटत नाही. शेतात जाऊन पावसाच्या आल्हाददायक वातावरणाचा आनंद घेतोय. 

संपादन : श्रीनिवास दुध्याल