तब्बल ३५ वर्षांनी इस्लामपूर नगरपालिकेच्या सभागृहात झळकल्या प्रतिमा... | Sakal
sakal

बोलून बातमी शोधा

तब्बल ३५ वर्षांनी इस्लामपूर नगरपालिकेच्या सभागृहात झळकल्या प्रतिमा...

तब्बल ३५ वर्षांनी इस्लामपूर नगरपालिकेच्या सभागृहात झळकल्या प्रतिमा...

इस्लामपूर (जिल्हा सांगली) : विद्यमान नगराध्यक्ष व नगरसेवकांच्या कार्यकालाचा आज समारोप झाला. सात दिवसांची मुदत घेऊन आयोजित करण्यात आलेल्या आजच्या सभेला जिल्हाधिकाऱ्यांनी बेकायदेशीर ठरवल्याने सभा होऊ शकली नाही; परंतु राष्ट्रवादी-अपक्ष आघाडीच्या नगरसेवकांच्या अनुपस्थितीत आज छोटेखानी समारोपाचा कार्यक्रम झाला.

जुन्या सुमारे ३५ वर्षांपूर्वी करण्यात आलेल्या एका ठरावाचा आधार घेत आज पालिकेच्या सभागृहात माजी मुख्यमंत्री पद्मभूषण वसंतदादा पाटील यांचे तैलचित्र लावण्यात आले तसेच नगरसेवक प्रदीप लोहार यांनी केलेल्या मागणीनुसार शिवसेनाप्रमुख स्व. बाळासाहेब ठाकरे यांच्याही तैलचित्राचे अनावरण उपस्थित मान्यवरांच्या हस्ते करण्यात आले.

हेही वाचा: सुपरचे ‘हार्ट फेल’ झाल्याने गरिबांचे हृदय धोक्यात!

नगराध्यक्ष निशिकांत पाटील, विकास आघाडीचे उपाध्यक्ष वैभव पवार, शिवसेनेचे जिल्हाप्रमुख नगरसेवक आनंदराव पवार, नगरसेवक शकील सय्यद, प्रदीप लोहार यांच्यासह मुख्याधिकारी वैभव साबळे व मान्यवरांच्या हस्ते पुष्पहार अर्पण करून प्रतिमेस अभिवादन करण्यात आले. सभागृहातील सर्वच दिवंगत नगराध्यक्ष यांच्या प्रतिमांना पुष्पहार अर्पण करण्यात आले होते. नगराध्यक्ष निशिकांत पाटील यांनी सभागृहात समारोपाचे भाषण केले. पाच वर्षांच्या कार्यकाळात मुख्याधिकारी दीपक झिंजाड, प्रज्ञा पवार आणि वैभव साबळे या तिघांच्यासह पालिका कर्मचारी व अधिकाऱ्यांची चांगलीच साथ मिळाल्याची भावना त्यांनी व्यक्त केली.

हेही वाचा: धान्याचे भाव कमी होण्याची शक्यता; कोरोनाच्या धास्तीने वर्दळ कमी

हे शहर राज्यात सर्वोत्तम शहर म्हणून झळकावे, येत्या काळात राजकारणविरहित विकास पावणारे शहर अशी वेगळी ओळख शहराची निर्माण व्हावी तसेच स्व. बाळासाहेब ठाकरे व वसंतदादा या दिग्गजांच्या उंचीला साजेसे कार्य या सभागृहात घडावे, अशी अपेक्षा त्यांनी व्यक्त केली. मुख्याधिकारी वैभव साबळे म्हणाले, "समारोपाचा कार्यक्रम घेण्याची जबाबदारी प्रशासनाची होती; परंतु काही कारणांनी अडथळे आले. लवकरच प्रशासन अशा पद्धतीचा एक उपक्रम घेईल. शेवटच्या क्षणी कमी कालावधीत ताकदीच्या, प्रगल्भ माणसांसोबत काम करता आल्याचे समाधान मिळाले."

परत सभागृहात येणार नाही!

  • या पाच वर्षात चांगले काम केल्याचे समाधान व्यक्त करत 'माझ्या बाकीच्या सहकाऱ्यांचे पुन्हा सभागृहात येणे होईल; परंतु मी येणार नाही' असे विधान नगराध्यक्ष निशिकांत पाटील यांनी आपल्या भाषणात केले.

  • समारोपाच्या सभेला राष्ट्रवादी काँग्रेस व अपक्ष आघाडीचे सर्वच नगरसेवक गैरहजर राहिले. याशिवाय सत्ताधारी शहर विकास आघाडीचे अध्यक्ष व पक्षप्रतोद यांच्यासह काही नगरसेवकांनीही या सभेकडे पाठ फिरवली.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top