बाबासाहेबांच्या "येथील' परिषदेकडे होते जगाचे लक्ष 

सोलापूर ः सुमारे 92 वर्षांपूर्वी सोलापुरात झालेल्या महार वतन परिषदेत डॉ.बाबासाहेब आंबेडकर यांनी स्पृश्‍य व अस्पृश्‍य समाजाला त्यांच्या कर्तव्याची जाणीव करून दिली होती. या परिषदेत ते काय बोलतात याकडे संपूर्ण जगाचे लक्ष लागले होते. 

हेही वाचा.. कालकुपी ः सोलापुरातील हुतात्मा बाग 

परिषदेला 92 वर्षे पूर्ण 
डॉ. आंबेडकर यांच्या पहिल्या सोलापूर भेटीला आज (मंगळवारी) 92 वर्षे पूर्ण होत आहेत. 26 व 27 नोव्हेंबर 1927 रोजी सोलापुरात हे अधिवेशन भरले होते. या ऐतिहासिक परिषदेचा हा आढावा. बुधवार पेठेतील पंचाच्या चावडीमध्ये डॉ. आंबेडकर यांच्या अध्यक्षतेखाली ही परिषद झाली. या परिषदेचे कार्यकारी सदस्य विश्‍वनाथ मेघाजी बनसोडे, मुकिंदा कुंडलिका बाबरे, निवृत्ती तुकाराम बनसोडे, रामा तुकाराम सरवदे, पापा सोमाजी तळभंडारे, विठ्ठल दरी सरवदे, तुकाराम अंदुबा बाबरे, बळी तुळजाराम तळमोहिते, भिकाजी गुरय्या तळभंडारे होते. जिवाप्पा ऐदाळे स्वागताध्यक्ष, उद्धव धोंडे शिवशरण चिटणीस, हरिभाऊ तोरणे खजिनदार म्हणून कार्यरत होते. नगराध्यक्ष माणिकचंद शहा यांची प्रमुख उपस्थिती होती. 

हेही वाचा... येथील दुष्काळग्रस्तांची होरपळ, नेहरुही गहिवरले

साऱ्या जगाचे लागले होते लक्ष 
18 मार्च 1927 रोजी महाड चवदार तळ्याच्या परिषदेची पार्श्‍वभूमी या परिषदेला होती. स्पृश्‍य समाज आणि तत्कालीन वृत्तपत्रांनी अस्पृश्‍यांनी केलेल्या या सत्याग्रहावर टीकेची झोड उठवली होती. डॉ. आंबेडकर अस्पृश्‍यांना भलत्याच मार्गाकडे घेऊन जात आहेत. या प्रकारामुळे अस्पृश्‍यांना बहिष्काराला सामोरे जावे लागेल व कदाचित रक्तपातही होईल अशा वावड्या उठविण्यात आल्या. त्यामुळे बाबासाहेब सोलापुरातील परिषदेत काय बोलतात याकडे सर्वांचे लक्ष लागले होते. त्या सर्व टिका आणि प्रतिवादाला बाबासाहेबांनी चोख प्रत्युत्तर या परिषदेत दिले, इतकेच नव्हे तर स्पृश्‍य व अस्पृश्‍य लोकांना त्यांच्या कर्तव्याची जाणीव करून दिली. या घटनेचे हजारो सोलापूरकर साक्षीदार ठरले.