Miraj Politics : काँग्रेसला धक्का देत सिद्धार्थ जाधवांचा ठाकरे गटात प्रवेश; 'या' मतदारसंघातून लढवणार निवडणूक?

मिरज : मिरज तालुक्यातील काँग्रेसचे नेते प्रा. सिद्धार्थ जाधव (Congress leader Siddharth Jadhav) यांनी शिवसेनेच्या उद्धव बाळासाहेब ठाकरे (Shiv Sena Uddhav Thackeray) गटात प्रवेश केला. त्यामुळे आगामी विधानसभेसाठी मिरज मतदारसंघ (Miraj Constituency) महाविकास आघाडीकडून शिवसेनेला सोडला जाण्याची शक्यता आहे.

या अनुषंगाने प्रा. सिद्धार्थ जाधव यांनी मुंबई येथे मातोश्री निवासस्थानी पक्षप्रमुख उद्धव ठाकरे यांच्या हस्ते शिवबंधन बांधून शिवसेनेचा भगवा खांद्यावर घेतला. जाधव यांनी गेली पंधरा वर्षे काँग्रेसमध्ये विविध पदांवर काम केले आहे. यापूर्वी २०१४ ची विधानसभा निवडणूक काँग्रेसकडून लढवली. त्या वेळी दुसऱ्या स्थानाची मते मिळवून प्रतिस्पर्धी उमेदवार तथा विद्यमान मंत्री सुरेश खाडे यांच्याशी अटीतटीची लढत दिली होती.

काँग्रेसच्या मागासवर्गीय विभागाचे प्रदेशाध्यक्ष म्हणून काम पाहिले आहे; तर कर्नाटक राज्याचे पक्ष निरीक्षक म्हणूनही काँग्रेसकडून त्यांना संधी देण्यात आली होती. या आधी मिरज विधानसभा भाजप, काँग्रेस आणि शिवसेना अशा तिरंगी लढतीत काँग्रेस आणि शिवसेना हे अनुक्रमे दुसऱ्या आणि तिसऱ्या क्रमांकावर असायचे. मात्र, यंदा महाविकास आघाडीत राष्ट्रवादी, शिवसेना, काँग्रेस, वंचित बहुजन आघाडी समवेत असल्यामुळे मिरज मतदारसंघाची लढत अटीतटीची होणार आहे.

यावेळी उद्धव ठाकरे यांच्याकडून प्रा. सिद्धार्थ जाधव यांना शिवबंधन बांधले. तसेच मिरज मतदारसंघासाठी कामाला लागण्याचे आदेश दिले आहेत. महाविकास आघाडीकडून हा मतदारसंघ शिवसेनेकडे येणार असल्यामुळे भाजप आणि शिवसेना ठाकरे गटात थेट लढतीची शक्यता वर्तवण्यात आली आहे. यावेळी शिवसेनेचे पश्चिम महाराष्ट्र संपर्कप्रमुख नितीन बानगुडे-पाटील, जिल्हाप्रमुख संजय विभूते, अविनाश पाटील यांच्यासह पदाधिकारी, सांगली जिल्ह्यातील शिवसैनिक मोठ्या संख्येने उपस्थित होते.