सोलापूरच्या नूतन महापौरांची आज परीक्षा 

सोलापूर ः महापौर निवडीनंतर आज (शुक्रवार) महापालिकेची पहिली सभा होत आहे. महापौर निवडीच्या वेळी झालेल्या घडामोडींच्या पार्श्‍वभूमीवर ही सभा महापौर श्रीकांचना यन्नम यांच्यासाठी परीक्षा असणार आहे. 

शुभ वार्ता.... कांद्याचे दर होणार कमी

भाजपचे गट एकत्रित आले 
राज्यात सत्तांतर झाले आणि त्या पार्श्‍वभूमीवर महापालिकेतही मोठ्या हालचाली झाल्या. भाजपला महापौरपदापासून दूर ठेवण्यासाठी महाविकास आघाडीचा प्रयत्न झाला, मात्र तो अयशस्वी झाला. महापौरपदावर भाजपचाच उमेदवार विजयी झाला पाहिजे यासाठी भाजपमधील सर्व गट एकत्रित आले. उपमहापौर निवडीच्या वेळी पेच निर्माण झाला, महापौरपदावेळी तटस्थ भूमिका घेणाऱ्या शिवसेनेने उपमहापौर निवडीवेळी कॉंग्रेसला मदत केली. मात्र, तरीही महाविकास आघाडीचा उमेदवार विजयी होऊ शकला नाही. 

हेे आवर्जून वाचा.... संभाजी तलावात चिखल्या बदकांचा घोळका 

विषयपत्रिकेतील प्रस्तावांवरून होऊ शकतात मतभेद 
महापौर व उपमहापौर निवडीच्या वेळी भाजपचे सर्व गट एकत्रित आले तरी विषयपत्रिकेवरील काही प्रस्तावांवर त्यांचे मतभेद होऊ शकतात. त्यातच सध्या माता रमाई यांच्या पुतळ्यासंदर्भात वाद निर्माण झाला आहे. डॉ. आंबेडकर स्मारकासाठी महापालिका शाळेची जागा देण्याच्या प्रस्तावावरून असाच वाद निर्माण झाला आहे. या प्रस्तावाबाबत भाजपचे नेते काय निर्णय घेतात, त्यावरून सभागृहाचे कामकाज कसे सुरू राहील, हे स्पष्ट होणार आहे. 

चला पहायला.... सोलापुरात 50 हजारांचा आहे पेन 

कॉंग्रेस व शिवसेनेच्या भूमिकेकडे लक्ष 
महापौर व उपमहापौर निवडीच्या वेळी महाविकास आघाडी एकत्रित आणण्याचा प्रयत्न झाला असला, तरी सभेदरम्यान कॉंग्रेस, राष्ट्रवादी कॉंग्रेस व शिवसेना एकत्रित येणार का, हेही या सभेत स्पष्ट होणार आहे. राज्याच्या राजकारणात हे तिन्ही पक्ष एकत्रित आहेत, त्याचे प्रतिबिंब महापालिका सभेत दिसणार आहे का, याबाबतही उत्सुकता निर्माण झाली आहे. सध्या विधानसभेतील कामकाज आरोप-प्रत्यारोपांमुळे तापले आहे, अशा स्थितीत महापालिकेचे कामकाज शांततेत व व्यवस्थित चालविण्याची कसरत महापौरांना करावी लागणार आहे.