गावठी कोंबडीची पिल्ली देतो म्हणत शेतकऱ्यांची केली फसवणूक

बेळगाव : गावठी कोंबडीची पिले देतो, असे सांगून शेतकऱ्यांची फसवणूक करणाऱ्या एकाला माळमारुती पोलिसांनी सोमवारी (ता. ८) अटक केली. हरीश एम. कोट्टूर (वय २५, रा. आंजनेयनगर, बेळगाव) असे संशयिताचे नाव आहे. त्याने बेळगावसह परराज्यातील शेतकऱ्यांना जवळपास दोन कोटी रुपयांचा गंडा घातल्याचा संशय आहे. अशोक एम. जी. (रा. अनंतपुरम) यांच्या फिर्यादीवरुन ही कारवाई करण्यात आली.

याबाबत पोलिसांकडून मिळालेली अधिक माहिती अशी, हरिषने आंजनेयनगरात एचजीके ऑरगॅनिक ॲग्रो प्रायव्हेट लिमिटेड या नावाने व्यवसाय सुरु केला होता. आपल्याकडे गावठी कोंबडीची पिल्ले मिळतील अशी जाहिरात त्याने फेसबुकवर केली होती. त्याला भुलून फिर्यादीने त्याच्याशी संपर्क साधला. त्यावेळी हरीशने कोंबडीची पिल्ले प्रत्येकी ३० रुपयाला मिळतील असे सांगितले.

हेही वाचा - हॉस्पिटलचे उद्घाटन पवारांकडून अन् मेडिकल कॉलेजचे शहांकडून : चर्चेला उधाण, पाहा व्हिडिओ -

फिर्यादीने दहा हजार पिल्ले हवी असल्याचे सांगितल्यानंतर हरिषने त्यांना ३ लाख रुपये देण्यास सांगितले. आगाऊ रक्‍कम म्हणून दीड लाख रुपयांची मागणी केली. मात्र, फिर्यादीने पहिल्यांदा ५० हजार रुपये देतो व पिल्ले मिळाल्यानंतर सर्व रक्कम दिली जाईल, असे सांगितले. त्यानुसार १७ जुलै २०२० रोजी ४० हजार व दुसरे दिवशी १० हजार असे एकूण ५० हजार रुपये त्यांनी संशयिताच्या बॅंक खात्यावर जमा केले.

मात्र, पैसे भरुन बरेच दिवस उलटले तरी संशयिताने कोंबडीची पिल्ले दिली नाहीत. त्यांनी त्याच्याशी वारंवार संपर्क साधला. पण, संशयिताने प्रतिसाद दिला नाही. आपली फसवणूक झाल्याचे लक्षात येताच अशोक यांनी सोमवारी माळमारुती पोलीस स्थानकात फिर्याद नोंदवली. पोलीस निरीक्षक सुनील पाटील यांनी तातडीने गुन्हा दाखल करुन घेत संशयित हरिषला अटक केली. जिल्हा रुग्णालयात वैद्यकीय तपासणी करुन त्याची कारागृहात रवानगी करण्यात आली. संशयिताने बेळगावसह कर्नाटक, महाराष्ट्र व अन्य राज्यातील हजारो शेतकऱ्यांची फसवणूक केल्याचा संशय पोलिसांना आहे. त्याने सुमारे दोन कोटी रुपयांचा गंडा घातल्याचा अंदाज आहे.

हेही वाचा - ब्रेकींग : पालकमंत्री सतेज पाटील यांना कोरोनाची लागण

संपादन - स्नेहल कदम