राष्ट्रवादीत नाराजीनाट्य? बॅनरवरून नेत्यांचे फोटो गायब, जयंत पाटील नाराज

शिंदे-फडणवीस सरकार स्थापन झाल्यापासून पुन्हा एकदा राज्यात घडामोडींना वेग आला आहे. शिवसेनेच्या फुटीनंतर आता राष्ट्रवादी काँग्रेसमध्येही नाराजीनाट्य सुरू झाल्याचे बोलले जात आहे. अडीच वर्षांपूर्वी उपमुख्यमंत्रीपद आणि आता विधानसभेतील विरोधी पक्षनेते पदापासून माजी मंत्री जयंत पाटील यांना दूर ठेवण्यात आले आहे. त्यामुळे राष्ट्रवादी काँग्रेसचे नेते जयंत पाटील नाराज असल्याची चर्चा राजकीय वर्तुळात सुरू आहे.

जयंत पाटील हे शरद पवार यांचे विश्वासू समजले जातात. 18 जुलैला प्रतीक पाटील यांचा वाढदिवस होता. त्यानिमित्त जिल्ह्यातील विविध ठिकाणी बॅनर लावण्यात आले होते. या बॅनरवरील शरद पवार व राष्ट्रवादी काँग्रेसच्या वरिष्ठ नेत्यांचे फोटो नसल्याने राष्ट्रवादीत नक्की काय चालले आहे. जयंत पाटील नाराज आहेत का?, शिवसेने प्रमाणे राष्ट्रवादीतही काही स्थित्यंतरे होणार का, अशी चर्चाही सुरू झाली आहे.

जयंत पाटील यांचे चिरंजिव प्रतीक पाटील यांच्या वाढदिवसाचे बॅनर सांगली जिल्ह्यात लावले जात आहेत. मात्र या बॅनरवर ज्येष्ठ नेते शरद पवार, विरोधी पक्षनेते अजित पवार, खासदार सुप्रिया सुळे यांचे फोटो व नावे नाहीत. त्यामुळे जयंत पाटलांच्या समर्थकांत नाराजी असल्याचे बोलले जात आहे.

फलकांवरून फोटो गायब करून नाराजी व्यक्त करण्याचा हा सांगली पॅटर्नतर नाही ना, अशी चर्चा सुरू झाली आहे. की राज्यातील पक्षांतराचे वारे राष्ट्रवादी काँग्रेसमध्येही शिरते आहे का? यावर उलटसुलट चर्चा रंगली आहे. सांगलीतीलच आणखी एक नेते रोहित पाटील यांच्या अभिनंदन फलकावरूनही राष्ट्रवादी काँग्रेसच्या नेत्यांची फोटो गायब होते. रोहित पाटील हे माजी उपमुख्यमंत्री दिवंगत आर.आर. पाटील यांचे चिरंजिव आहेत.