विद्यार्थ्यांनी पार पाडले 'कर्तव्‍य'

सातारा : शालेय मुलांना प्लॅस्टिक कचऱ्याचे दुष्परिणाम कळावेत आणि लहान वयातच त्यांना प्लॅस्टिक कचरा निर्मूलनाचा छंद जडावा, यासाठी कर्तव्य सोशल ग्रुप आणि सागर मित्र अभियान या सेवाभावी संस्थेने सुरू केलेल्या या उपक्रमाला प्रतिसाद मिळत आहे. शाळेतील विद्यार्थ्यांनी गोळा केलेला प्लॅस्टिक कचरा दर महिन्याच्या दोन तारखेला उचलून त्याचे विघटन करण्यात येत आहे. काल तब्बल 75 किलो प्लॅस्टिक कचरा गोळा झाला. त्याचे विघटनही करण्यात आले. 

हे वाचा : चालाल तर चालाल !

या शाळा सहभागी...

कर्तव्य सोशल ग्रुप, सागर मित्र अभियान या संस्थेमार्फत सातारा शहर परिसरातील शाळांना प्लॅस्टिक मुक्तीसाठी आवाहन केले होते. त्यासाठी "कर्तव्य'च्या संस्थापिका वेदांतिकाराजे भोसले यांच्या अध्यक्षतेखाली बैठक झाली होती. शाहूपुरी माध्यमिक विद्यालय, अण्णासाहेब राजेभोसले प्राथमिक विद्यालय, सुशीलादेवी साळुंखे हायस्कूल, अण्णासाहेब कल्याणी विद्यालय, लोकमंगल हायस्कूल नागेवाडी, ब्लॉसम स्कूल आदी शाळांतील विद्यार्थ्यांनी या उपक्रमात सहभाग घेत दूध पिशवी, तेल पिशवी, पाण्याची बाटली, प्लॅस्टिक पाऊच, किराणा मालासाठी वापरण्यात येणारे प्लॅस्टिक, चॉकलेट रॅपर, तुटक्‍या वॉटर बॅगा, प्लॅस्टिक चप्पल, प्लॅस्टिक डबे, कंपास, फोल्डर, पट्टी यासह प्लॅस्टिकपासून बनवलेल्या तुटक्‍या, निरुपयोगी वस्तू असा सर्व प्रकारचा सुमारे 75 किलो कचरा गोळा केला होता. 

आवश्‍‍य वाचा : Video : हुतात्मा संदीप सावंत यांच्या शाैर्याला साश्रुपूर्ण निराेप

तुम्‍हीही व्‍हा सहभागी
शाळांत गोळा झालेला कचरा गुरुवारी "कर्तव्य' ग्रुपने वाहनात भरून विघटनासाठी नेला. यावेळी या शाळेतील विद्यार्थ्यांनी कचरा निर्मूलन आणि प्लॅस्टिक मुक्तीची शपथ घेऊन "माझे घर, माझी शाळा कचरामुक्त' करण्याचा निधार केला. उचललेल्या या कचऱ्याचे विघटनही सागर मित्र सेवाभावी संस्थेमार्फत केले जात आहे. या उपक्रमात शहरातील सर्व शाळांनी सहभागी व्हावे आणि आपल्या शाळेचा परिसर आणि पर्यायाने आपले सातारा शहर स्वच्छ आणि सुंदर बनवण्याठी योगदान द्यावे. तसेच नागरिकांनीही प्लॅस्टिक कचरा इतरत्र न टाकता विद्यार्थ्यांकडे द्यावा अथवा कर्तव्य ग्रुपशी संपर्क साधावा. उपक्रमात सहभागी होण्यासाठी सोहम कुलकर्णी (8412979058), सुहास वहाळकर (9420772773) यांच्याशी संपर्क साधावा, असे आवाहन वेदांतिकाराजे भोसले यांनी केले आहे.