कोल्हापूर : गेल्यावर्षी झालेल्या लोकसभेच्या निवडणुकीत गाजलेल्या ‘आमचं ठरलंय’ या नावाने स्थापन करण्यात आलेल्या विकास आघाडी पक्षाला राज्य निवडणूक आयोगाने अखेर मान्यता दिली. या पक्षाने नोंदणी केल्यानंतर राज्य निवडणूक आयोगाने त्यावर हरकती मागवल्या होत्या; पण एकही हरकत न आल्याने या नावाचा नवा नोंदणीकृत पक्ष राज्यात
अस्तित्वात आला.
दरम्यान, या नोंदणीकृतपक्षाचे कार्यक्षेत्र महाराष्ट्र राज्य असून ही नोंदणी फक्त राज्यातील महापालिका, नगरपालिका, नगर पंचायती, जिल्हा परिषद व पंचायत समिती निवडणुकीसाठीच राहणार आहे. या नावांत बदल करायचा झाल्यास आयोगाची पूर्वपरवानगी घेणे आवश्‍यक असल्याचे आयोगाने यासंदर्भात काढलेल्या आदेशात म्हटले आहे.
लोकसभेच्या २०१९ च्या निवडणुकीत ‘आमचं ठरलंय’ या घोषवाक्‍याने चांगलीच रंगत आणली. हा शब्द राज्यभर गेला. त्याचे पडसादही निवडणुकीत उमटले. त्यानंतर झालेल्या विधानसभेच्या निवडणुकीतही दक्षिण मतदारसंघात या घोषवाक्‍याने पुन्हा रंगत आणली आणि त्या वेळी त्याचा परिणाम दिसला. त्यानंतर ‘गोकुळ’ आणि ‘राजाराम’च्या निवडणुकीची तयारीही याच घोषवाक्‍याचा आधार घेऊन सुरू होती. ‘आता गोकुळ उरलंय’ असे नवे घोषवाक्‍य तयार झाले; पण या कोरोनाच्या वाढत्या प्रादुर्भावामुळे सहकारी संस्थांच्या निवडणुकाच पुढे गेल्याने या शब्दाचा करिष्मा दिसला नाही. ज्या वेळी या निवडणुका लागतील त्या वेळी त्याचा चमत्कार जिल्ह्याच्या राजकारणात पाहायला मिळणार आहे.
हेही वाचा- कोल्हापुरी दणका! एशियन पेंटने सोशल मीडिया प्लॅटफॉर्मवरून जाहीरात हटवली
कोरोनाच्या काळातच कसबा बावडा येथील श्रीराम सोसायटीचे माजी सभापती प्रमोद दिनकर पाटील यांनी ‘आमचं ठरलंय विकास आघाडी’ नावाच्या पक्षाच्या नोंदणीसाठी १५ फेबुवारी २०१९ ला आयोगाकडे अर्ज केला होता. आयोगाने यावर जनतेकडून हरकती मागवण्यासाठी १२ मार्चला या पक्षाचे नांव राजपत्रात प्रसिद्ध केले होते. हरकतीसाठी तीन महिन्यांचा कालावधी दिला होता. या कालावधीत एकही हरकत दाखल न झाल्याने अखेर आज आयोगाने ‘आमचं ठरलंय विकास आघाडी’ या नोंदणीकृत पक्षाला मान्यता देण्याचे आदेश काढले.
संपादन - अर्चना बनगे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.