'राजकीय जोडे बाहेर ठेवुन कारखान्याचा कारभार करा'

आजरा : आजरा कारखान्याच्या गळीत हंगाम प्रारंभ झाला. या कार्यक्रमाला जिल्हा परिषद उपाध्यक्ष जयवंतराव शिंपी, कारखान्याचे ज्येष्ठ संचालक अशोक चराटी आणि विष्णुपंत केसरकर उपस्थित नसल्याकडे शिवसेनेचे जिल्हाध्यक्ष विजय देवणे यांनी लक्ष वेधले असता मंत्री हसन मुश्रीफ यांनी ‘नो कमेंटस’ अशी प्रतिक्रीया दिली. काही दिवसांपूर्वी तालुक्यातील चराटी आणि शिंपी गट एकत्र आला आहे. या पार्श्‍वभूमीवर नेते मंडळी काय बोलतात? याबाबत तालुक्यात उत्सुकता होती. मात्र मंत्री मुश्रीफ यांनी याबाबत बोलणे टाळले. दरम्यान, राजकीय जोडे कारखान्याच्या गेट बाहेर ठेवून संस्थेचा कारभार करा, असा सल्ला नेतेमंडळींनी या कार्यक्रमात कार्यकर्ते पदाधिकाऱ्यांना दिला.

कार्यक्रमात देवणे म्हणाले, ‘‘कारखाना सुरु करण्यासाठी महाविकास आघाडीतील नेतेमंडळी एकत्र आली. त्यामुळे हा कारखाना सुरु झाला आहे. कारखान्यात यापुढे कोणतेही राजकारण आणू नये.’’ त्यांनी शिंपी, चराटी, केसरकर यांच्या अनुपस्थितीबद्दल लक्ष वेधले. हाच धागा पकडून मुश्रीफ म्हणाले, ‘‘केसरकर यांच्या अनुपस्थितीचे कारण प्रकृती स्वास्थ आहे. इतरांचे काय हे मला माहीत नाही.’’ दरम्यान, पालकमंत्री सतेज पाटील यांनीही आपल्या भाषणात कोणतेही राजकीय भाष्य केले नाही.

ते म्हणाले, ‘‘जिल्ह्यातील नेतेमंडळी एकत्री आली की काय होते हे आजरा साखर कारखाना उत्तम उदाहरण आहे. महाविकास आघाडीतील नेते हातात हात घालून विकासाचे राजकारण करत आहेत. त्यामुळे आजरा कारखाना सुरु होण्यास मदत झाली. हीच भूमिका तालुक्यातील नेतेमंडळींनी कायम ठेवावी.’’ खासदार संजय मंडलिक, आमदार प्रकाश आबिटकर, आमदार राजेश पाटील यांनीही कारखान्याच्या हितासाठी राजकीय मतभेद टाळावे असाच सुर व्यक्त केला.

जेवणाचा डबाही घरातून आणा...

कारखान्याचा कारभार काटकसरीने करा. खर्चात बचत करा. कारखान्याचा चहा देखील घेवू नका. जेवणाचा डबा घरातून आणा असा मौलिक सल्ला मंत्री मुश्रीफ व पालकमंत्री पाटील यांनी कार्यक्रमात दिला.