Holi Festival 2023 : यंदाही होळी लहान, पोळी दान!

कोल्हापूर : होळीच्या पार्श्वभूमीवर बाजारपेठ सज्ज झाली असून, यंदाही ‘होळी लहान, पोळी दान’ या उपक्रमावर भर दिला जाणार आहे. सार्वजनिक मंडळे प्रतीकात्मक होळी साजरी करून शेणी स्मशानभूमीला देणार आहेत. याबाबतचे आवाहन महापालिकेसह विविध सेवाभावी संस्थांनी केले आहे.

दरम्यान, सोमवारी (ता. ६) होळीचा सण सर्वत्र साजरा होणार आहे. पर्यावरणपूरक होळीचा सण साजरा करताना कोल्हापूरकरांनी नेहमीच विधायकतेचा विचार जपला आहे. रस्ते खराब होऊ नयेत, या उद्देशाने प्रतीकात्मक पाच शेणींची आणि तीही तरंगती होळी साजरी होणार आहे.

बाजारपेठेत विविध आकारातील टिमक्या उपलब्ध असून, खरेदीसाठी गर्दी होत आहे. ताशा स्क्रू, बुट्टी ताशांची यंदा क्रेझ आहे. प्लास्टिक आणि स्टील फ्रेममधील या ताशांना मोठी मागणी आहे. याबाबत साजीद मोमीन म्हणाले, ‘‘चामडे महाग असल्यामुळे बुट्टी ताशांना मागणी आहे. टिमकी व हे ताशे ऐंशी रुपयांपासून दोनशे रुपयांपर्यंत उपलब्ध आहेत. त्यावर पाणी पडले तरी ते खराब होत नाहीत.’’