कोल्हापूर उत्तर : भाजपकडून सत्यजित कदमांच्या नावावर शिक्कामोर्तब

कोल्हापूर : कोल्हापूर उत्तर विधानसभा मतदार संघाच्या पोटनिवडणुकीसाठी भारतीय जनता पार्टीकडून माजी नगरसेवक नाना कदम (Satyajeet nana kadam) यांचे नाव निश्‍चित झाले. प्रदेशाध्यक्ष चंद्रकांत पाटील आज कदम यांच्या नावाची अधिकृत घोषणा करणार आहेत. कदम यांच्या नावाचा एबी फॉर्म आल्याची माहिती भाजपमधील (BJP) नेत्यांनी दिली.

कोल्हापूर उत्तर विधानसभा (Kolhapur North) मतदारसंघातील आमदार चंद्रकांत जाधव (Chanrakant Jadhav) यांचे निधन झाले. त्यामुळे या मतदारसंघात १२ एप्रिलला मतदान निवडणूक होणार आहे. सोमवारी (११) येथे भारतीय जनता पार्टीच्या इच्छुक उमेदवारांची मुलाखत झाली. या मुलाखतीचा अहवाल प्रदेशाच्या कोअर कमिटीकडे पाठविण्यात आला. या अहवालावर मुंबईमध्ये कोल्हापुरातील भाजपचे (BJP) नेते आणि कोरकमिटी सदस्य यांची बैठक झाली. या बैठकीत नाना कदम यांचे नाव निश्चित करून ते सेंट्रल बोर्डकडे पाठवण्यात आले. त्यानंतर दिल्लीमध्ये नाना कदम यांची उमेदवारी निश्चित झाली.

आज प्रदेशाध्यक्ष चंद्रकांत पाटील हे आज नाना उर्फ सत्यजित कदम यांच्या उमेदवारीची अधिकृत घोषणा करणार आहेत. त्यामुळे भारतीय जनता पक्षाच्या कार्यकर्त्यांच्या उत्साहाचे वातावरण आहे. भाजपची उमेदवारी निश्चित झाल्यानंतर निवडणुकीला वेग आला असून आता काँग्रेस (Congress) उमेदवाराच्या नावाची उत्सुकता आहे. कोल्हापूर उत्तर पोटनिवडणुकीसाठी भाजपाकडून सत्यजित कदम यांच्या नावावर शिक्कामोर्तब झाला आहे.