Loksabha Election : लोकसभेसाठी 'हा' उमेदवार डोळ्यासमोर ठेवूनंच आमचं काम सुरू; मुश्रीफांनी कोणाचं घेतलं नाव?

गडहिंग्लज : ‘यापूर्वी धनंजय महाडिक (Dhananjay Mahadik) या विभागाचे खासदार होते. आता संजय मंडलिक आहेत. सुरुवातीला अडीच वर्षांत त्यांना निधी मिळण्यात अडचणी आल्या. परंतु, युती शासनाच्या काळात मोठा निधी आणला. त्यात गडहिंग्लज (Gadhinglaj) शहराला झुकते माप दिले. आता येणाऱ्या लोकसभा निवडणुकीसाठी उमेदवारी कोणाची ठरली नसली तरी शिवसेना शिंदे गटाचे उमेदवार म्हणून मंडलिकच डोळ्यासमोर ठेवून आमचे काम सुरू आहे’, असे मत पालकमंत्री हसन मुश्रीफ (Hasan Mushrif) यांनी व्यक्त केले.

गडहिंग्लज शहरातील सुधारित नळ पाणी योजनेसह ५५ कोटींच्या विविध विकासकामांचा प्रारंभ व शहरातील ५२८ बांधकाम कामगारांना संसारोपयोगी साहित्य वितरणप्रसंगी ते बोलत होते. खासदार संजय मंडलिक (Sanjay Mandlik), धनंजय महाडिक यांची प्रमुख उपस्थिती होती. दरम्यान, पाणी योजना प्रारंभाच्या पार्श्वभूमीवर तिन्ही नेत्यांची रथामध्ये बसवून हजारो महिलांच्या उपस्थितीत शहरातून मिरवणूक काढण्यात आली.

खासदार मंडलिक म्हणाले, ‘काही तांत्रिक कारणाने गडहिंग्लजची पाणी योजना पुढे गेली होती. मी व मुश्रीफ यांनी पाठपुरावा करून योजना कार्यान्वित करण्यात यश आले. जनतेच्या गरजांनुसार विकासाची दिशा ठरवली. निवडणुका येतील व जातील. परंतु, विकासाच्या संकल्पना पूर्ण करण्याच्या आमचा नेहमीच प्रयत्न राहील. येत्या निवडणुकीत जनतेने महायुतीच्या मागे राहावे.’

खासदार महाडिक म्हणाले, ‘काँग्रेस प्रत्येक निवडणुकीत मूलभूत सुविधांची एकच घोषणा देत असे. पण त्यांनी त्या कधीच पूर्ण केल्या नाहीत. पंतप्रधान मोदींनी मात्र दहा वर्षांत जनतेच्या गरजा ओळखून त्यांचे सर्व प्रश्न सोडविले. अशक्य त्या विकासाच्या संकल्पना मोदींनी दशकभरात पूर्ण केल्या. विशेष करून महिलांच्या सक्षमीकरणावर त्यांचा भर राहिला.’

यावेळी किरण कदम, सिद्धार्थ बन्ने, महेश सलवादे यांची भाषणे झाली. रामगोंडा गुंडू पाटील यांनी स्वागत केले. प्रा. सुभाष कोरे यांनी सूत्रसंचालन केले. रश्मीराज देसाई यांनी आभार मानले. यावेळी सतीश पाटील, प्रकाश चव्हाण, वसंत यमगेकर, संग्राम कुपेकर, अमर मांगले, नरेंद्र भद्रापूर, प्रकाश पताडे, संतोष कांबळे, उदय परीट आदी उपस्थित होते.

मलाही सोबत नेल्यास...

‘मी व मंडलिक दोघेही गडहिंग्लजच्या बाहेरून पर्यायी मार्ग व रिंग रोडसाठी केंद्रीय मंत्री नितीन गडकरी यांच्याकडून निधी आणू’, अशी ग्वाही महाडिक यांनी दिली. त्यानंतर मुश्रीफ यांनी याबद्दल त्यांना धन्यवाद दिले. मुश्रीफ म्हणाले, ‘माझेही गडकरींसोबत चांगले संबंध आहेत. मी दिल्लीत जाऊन त्यांच्याकडून महामार्ग मंजूर करून आणला आहे. त्यांच्याकडे जाताना मलाही सोबत नेले तर आमच्या चांगल्या संबंधाची मदत होईल.’