'कुंभी'च्या उपाध्यक्ष पदी निवास वातकर

कसबा बीड - कुडित्रे (ता. करवीर) येथील कुंभी-कासारी साखर कारखान्याच्या उपाध्यक्षपदी सांगरूळ येथील निवास निवृत्ती वातकर यांची बिनविरोध निवड करण्यात आली. सभेच्या अध्यक्षस्थानी प्रादेशिक उपसंचालक (साखर) एस.एन.जाधव होते. यावेळी अध्यक्ष माजी आमदार चंद्रदीप नरके यांची प्रमुख उपस्थिती होती.

उत्तमराव वरूटे यांचा उपाध्यक्ष पदाचा कार्यकाल जूनमध्ये संपला होता. पण कोरोनामुळे निवड लांबली होती. उपाध्यक्ष पदासाठी संचालक जयसिंग ज्ञानदेव पाटील यांनी नाव सुचविले. त्याला आनंदराव पाटील यांनी अनुमोदन दिले. यावेळी  बोलताना अध्यक्ष चंद्रदीप नरके म्हणाले, गेली नऊ वर्षे ऊसाला दर जास्त आणि साखरेला कमी अशी अवस्था आहे. त्यामुळे एफआरपी देण्यासाठी सर्वच कारखान्यांसमोर मोठ्या अडचणी निर्माण झाल्या आहेत. यावेळी पी.डी.पाटील, दादासाहेब लाड व अनिल पाटील यांनी मनोगत व्यक्त केले. यावेळी सर्व संचालक कार्यकारी संचालक अशोक पाटील, सचिव प्रशांत पाटील आदी उपस्थित होते. निवडी नंतर उत्साही सांगरूळकरांनी गुलालाची उधळण व फटाक्यांची आतषबाजी केली.

हे पण वाचा -  ब्रेकिंग - कोल्हापूर महानगरपालिकेचे आयुक्त मल्लिनाथ कलशेट्टी यांची बदली

सांगरूळला तब्बल २६ वर्षानंतर संधी

राजकीय दृष्ट्या संवेदनशील असणाऱ्या सांगरूळ गावाला तब्बल २६ वर्षानंतर चंद्रदीप नरके यांचे कट्टर समर्थक निवास वातकर यांना संधी मिळाली आहे. यापुर्वी मारूती खाडे यांनी तीन वेळा व भिवाजी खाडे यांनी एकदा व १९९४/९५ साली विश्वनाथ खाडे यांना संधी मिळाली होती. यामुळे सांगरूळ ग्रामस्थांमध्ये उत्साहाचे वातावरण आहे.

 संपादन - धनाजी सुर्वे