तुळशी धरण 90 टक्के भरले! दुपारपर्यंत धरण ओसंडून वाहण्याची शक्यता

राधानगरी(कोल्हापूर): राधानगरी धरणाच्या उच्चतम पाणीपातळीला केवळ अर्धा फूट कमी आहे. आज दुपारपर्यंत ही पातळी पूर्ण होऊन धरण पूर्ण भरण्याची शक्यता आहे. त्यानंतर धरणात येणाऱ्या पाण्याच्या प्रवाहावर किती स्वयंचलित दरवाजे खुले होणार याचे गणित अवलंबून आहे.

सध्या 347 फूट इतकी पाणीपातळी झाली असून केवळ अर्धा फूट कमी आहे. भोगावती नदी अद्यापही धोक्याच्या पातळीच्या वरुनच वाहत आहे. गेल्या दोन दिवसाची उघडीप असूनही भोगावतीचे महापुराचे पाणी स्थिर असल्याने येथील ग्रामस्थ व शेतकऱ्यांमध्ये चिंतेचे वातावरण आहे.

राधानगरी तालुक्यात पाऊस बऱ्यापैकी शांत झाला असला तरी भोगावती नदीला आलेला महापूर अद्याप ओसरलेला नाही. याचे पाणी नदीपात्रा पेक्षा खूप दूरवर पसरले आहे. गेल्या दोन दिवसात पावसाचा जोर कमी झाला असला तरी अपेक्षेप्रमाणे नदीचे पाणी कमी होताना दिसत नाही. दोन दिवसात केवळ तीन फूट पाणी उभे कमी झाल्याने नदी तीरावरील पिके धोक्यात आली आहेत. अशातच आज धरण भरल्यानंतर होणारा विसर्ग व किती प्रमाणात असेल यावर महापुराची तिव्रता अवलंबून आहे.

आज दुपारपर्यंत धरण ओसंडून वाहण्याची शक्यता आहे. जर पाणलोट क्षेत्रात पावसाचा जोर अचानक वाढला आणि स्वयंचलित सर्व दरवाजे खुले झाले तर धोका निर्माण होण्याची भीती आहे. मात्र सध्यस्थितीत पाऊस मर्यादित असल्याने एखाद दुसरा दरवाजा खुला होईल अशी स्थिती आहे. तुळशी धरण ९० टक्के भरले आहे.