आयुष्य जसे आहे, तसे जगायला शिका

27477
प्रसाद कुलकर्णी
..........
आयुष्य जसे आहे, तसे जगायला शिका

प्रसाद कुलकर्णी ः आनंदयात्रा एकपात्री कार्यक्रम उत्साहात

सकाळ वृत्तसेवा
कोल्हापूर, ता. २४ ः ‘आयुष्य सुंदर आहे. ते जसे आहे, तसे जगायला शिका. जीवनाकडे बघण्याचा दृष्टिकोन सकारात्मक ठेवा,’ असे मत प्रसिद्ध कवी व प्रेरणादायी व्याख्याते प्रसाद कुलकर्णी यांनी व्यक्त केले. सारस्वत विकास मंडळच्या सुवर्णमहोत्सवी वर्षानिमित्त आज त्यांचा ७७० वा ‘आनंदयात्रा’ हा एकपात्री कार्यक्रम झाला. गोविंदराव टेंबे नाट्यगृह (देवल क्लब) येथे रंगलेल्या या कार्यक्रमात आपल्या आयुष्यातील किस्से आणि उदाहरणे देत आयुष्याबद्दल सुंदर विवेचन केले.
आयुष्य खूप छान आहे. आपण नको त्यावेळी नको त्या गोष्टींना अतिमहत्त्व देतो. घडून गेलेल्या गोष्टींचे दुःख उगाळत बसतो. नियतीवर हुकूमत कुणाचीच चालत नाही. याचे उदाहरण देताना ते म्हणाले, ‘प्रत्येक घटनेकडे पाहण्याचा आपला दृष्टिकोन वेगवेगळा असतो. आयुष्य जगताना ज्यात रस आहे, त्याप्रमाणे जगायला शिका. कर्तृत्व आणि चारित्र्य या गोष्टी कोठेही विकत मिळत नाहीत. क्रिकेटपटू सचिन तेंडुलकर दहावीत नापास झाला. आता दहावीच्या पुस्तकात सर्वप्रथम त्याचा धडा आहे. आपल्याला कित्येक कोट्यवधी रुपयांचा धनादेश परमेश्‍वराने दिला आहे. त्याकडे पाहण्याचा दृष्टिकोन सकारात्मक ठेवा. पेला भरलेला आहे की अर्धा आहे, याकडे कसे पाहणार, त्याप्रमाणे जग आहे.’
कुलकर्णी यांनी कार्यक्रमाचा शेवट ‘जब आप आये इस जग में, तो जग हसें और आप रोए. आप ऐसी करणी किजीये की, आप हसे और जग रोए’ या कबिरांच्या कवितेतील ओळींचा अर्थ सांगून केला.
दरम्यान, या कार्यक्रमानिमित्त आंतरराष्ट्रीय सांगीतिक कलाकार इंद्रनिल कामत, तनय कामत यांचा सत्कार करण्यात आला. यावेळी मंडळाचे अध्यक्ष मोहन देशपांडे, उपाध्यक्ष सिद्धार्थ लाटकर, पदाधिकारी अमित सलगर, सारस्वत विकास मंडळाचे सचिन जनवाडकर, सहसचिव शरद कारखानीस, गुरुनाथ देशपांडे आदी मान्यवर उपस्थित होते.
............