Kolhapur Crime : कडबाकुट्टी यंत्रानं घेतला सासू-सुनेचा बळी; विजेच्या धक्क्यानं दोघींचा दुर्दैवी अंत, गावावर शोककळा

नंदगाव : म्हाळुंगे (ता. करवीर) येथे काल सायंकाळी गोठ्यात जनावरांसाठी कडबाकुट्टी काढत असताना सासू-सुनेचा विजेचा धक्का (Electric Shock) बसून जागीच मृत्यू झाला. श्रीमती आनंदी नामदेव मोरबाळे (वय ७०) व सुनीता शामराव मोरबाळे (४०) अशी त्यांची नावे आहेत.

याबाबत पोलिसांकडून दिलेली माहिती अशी : आनंदी यांच्यासह सून सुनीता, धाकटा मुलगा नागोजी जनावरांच्या धारा काढण्यासाठी गावापासून काही अंतरावर असलेल्या कुर्डू रस्त्यावरील गोठ्यावर गेले होते. धारा काढून झाल्यानंतर नागोजी दूध घालण्यासाठी गावातील डेअरीकडे गेले.

त्यानंतर आनंदीबाई व सुनीता यांनी कडबाकुट्टी करण्यासाठी मशीन सुरू केले असावे. त्यात त्यांना जोरदार विजेचा धक्का बसला. खूप उशीर झाल्याने दोघी घरी आल्या नाहीत म्हणून आनंदीबाई यांची धाकटी सून नीता गोठ्यावर गेल्या. त्यांनी घटनास्थळाचे चित्र पाहून आरडाओरडा केला. तो ऐकून गोठ्याशेजारील सुधाकर पाटील यांनी तेथे धाव घेतली.

दुर्घटना लक्षात येताच सुधाकर यांनी मशीनचा वीजपुरवठा बंद केला व आनंदीबाई यांच्या दोन्ही मुलांना दूरध्वनी करून घटनास्थळी बोलावले. आनंदीबाई यांचा मोठा मुलगा शामराव कामानिमित्त बाहेरगावी गेला होता. दोघांनीही घटनास्थळी येऊन याबाबतची फिर्याद इस्पुर्ली पोलिस ठाण्यात दिली.

त्यानंतर पोलिसांनी घटनास्थळी येत पंचनामा केला. सुनीता यांना पंधरा वर्षांची मुलगी आहे. पती शामराव यांचा टेम्पो वाहतुकीचा व्यवसाय आहे. मोरबाळे कुटुंबीयांची जमीन कमी आहे. त्यामुळे दूध व्यवसाय, शेतात मोलमजुरी करून ते आपला उदरनिर्वाह करतात.