कळेतील घरात अखंड खेळ चाले...

कळे (कोल्हापूर) ः  येथे भरवस्तीत सुरू असलेल्या जुगार अड्ड्यावर कळे पोलिसांनी छापा टाकून निवृत्त पोलिस कर्मचाऱ्यासह नऊ जणांना ताब्यात घेतले. कारवाई दरम्यान, एक शिक्षक व निवृत्त पोलिस कर्मचाऱ्यासह तिघे पळाले.

घटनास्थळ व पोलिसातून मिळालेल्या माहितीनुसार, कळेतील चर्मकार वसाहतीत राजाराम ऊर्फ दुजा दादू पोवार याच्या राहत्या घरी पहिल्या मजल्यावर जुगार अड्डा सुरू होता. याबाबत कळे पोलिसांना माहिती मिळाली. त्यानुसार संबंधितांना गतमहिन्यात कारवाई करून समज दिली होती. तरीही दिवस-रात्र जुगार अड्डा सुरूच होता. राजाराम उर्फ दुजा दादू पोवार, कुमार बाबुराव कासार, प्रकाश पांडुरंग माळवे, मोहन पांडुरंग शिरसाट, शिवाजी धोंडीराम कुरणे, सर्जेराव पांडुरंग सुतार, सागर बाबुराव दंताळ, सखाराम सदाशिव इंजुळकर (कळे) व सेवानिवृत्त सहायक फौजदार सर्जेराव मोहन पाटील (रा. खाटांगळे, ता. करवीर) यांना ताब्यात घेतले असून त्यांच्याकडून पाच हजार चारशे रोकडसह मुद्देमाल जप्त केला आहे. 

संशयितांचा गोंधळ 
दरम्यान, जुगारअड्ड्याशेजारील एका विमा एजंटानेच पोलिसांत निनावी तक्रार दिल्याच्या तसेच 
घरातील सीसीटीव्ही फुटेज स्थानिक वृत्तवाहिनीच्या पत्रकारांना पुरवल्याच्या गैरसमजातून सर्जेराव कुरणेसह अन्य संशयितांनी मद्यप्राशन करून संबंधित विमा एजंटाच्या दारात तासभर गोंधळ घातला. याबाबतची माहिती मिळताच पोलिसांनी त्यांना "खाक्‍या' दाखवत पिटाळून लावले. 

दार तोडून कारवाई 
वीस वर्षांपासून हा अड्डा सुरू होता. भरवस्तीत सुरू असलेल्या अवैध धंद्यामुळे नागरिक हैराण होते. भीतीपोटी कोणीही तक्रार देण्यास तयार नव्हते. त्यामुळे सहायक पोलिस निरीक्षक श्रीकांत इंगवले व हेडकॉन्स्टेबल रंगराव सौंदडे दुपारी एकच्या सुमारास साध्या वेषात दुचाकीवरून आले. आतून कडी लावली असल्याने दरवाजा उघडला नाही. धडक देऊन दरवाजाचा कडी-कोयंडा तोडून पोलिसांनी आत प्रवेश केला.

संपादन - रंगराव हिर्डेकर