यामुळेच म्हणतात जगात भारी कोल्हापुरी ; 'या' गावात पाहुणा आल्यास होतोय दंड 

कोल्हापूर - कोल्हापूर म्हटले की येथे जगापेक्षा वेगळे असे काहीतरी असते. त्यामुळेच जगात भारी कोल्हापुरी असे सहज म्हटले जाते. आताही अशीच एक घटना आहे, नक्कीच ती जगापेक्षा वेगळी आहे. सोशल मीडियावर तर या घटणेने धुमाकुळच घातला आहे. जिल्ह्यातील भूदरगड तालुक्यातील म्हसवे या ग्रामपंचायतीने काढलेली नोटीस सोशल मीडियावर मोठ्या प्रमाणात व्हायरल होत आहे. 

संपूर्ण जगासह आता खेडेगावातही कोरोनाची भीती पसरली आहे. कोरोनाचा प्रसार रोकण्यासाठी शासन जनजागृती करत आहे. त्याचप्रमाणे ग्रामपंचायतीही आपापल्या परीने ग्रामस्थांमध्ये जनजागृती करण्याचा प्रयत्न करत आहेत. म्हसवे ग्रामपंचायतीनेही अशी जनजागृती केली आहे. त्यासाठी त्यांनी एक खास नोटीस काढून लोकांना सावध केले आहे.  ग्रामपंचायतीच्या या नोटीसीची ग्रामस्थांनी तर दखल घेतली आहेच. शिवाय सोशल मीडियावर तर धम्माल केली आहे. ग्रामदेवतेच्या पुजेसाठी कुणीही जमू नका किंवा पाहुण्यालाही बोलावू नका, अशी नोटीस काढली आहे.  

अशी आहे ग्रामपंचायतीची नोटीस  

सर्व ग्रामस्थांना कळविण्यात येते की. उद्या दि.12 जून रोजी आपल्या म्हसवे  गावाची  मिरगी  म्हाई करण्यात येणार आहे. म्हाई ही घरातल्या घरात करावी. कोणीही  बाहेर गावातील पै पाहुणे बोलाऊ नये. कोणीही देवळात नैवेद्य दाखवायला जाऊ नये. सर्वानी घरातूनच नैवेद्य दाखवावा. वरील नियमांचे उल्लंघन केल्यास खालील प्रमाणे  दंडात्मक कारवाई करण्यात येईल. 

 नैवेद्य दाखवायला आल्यास 300/

घरी एक पाव्हणा दिसल्यास 300/

घरी  दोन पाव्हणे दिसल्यास 600/

दोन पेक्षा जास्त पाव्हणे दिसल्यास 1000/- रुपये 

 असे दंड आकारण्यात येतील. याची सर्व ग्रामस्थांनी दक्षता घ्यावी. 

वरील कामाची अंमलबजावणी करण्यासाठी  कोरोना स्वयंसेवक कमिटीतील 60 स्वयंसेवक कार्यरत असतील. 
या पैकी अंबाबाई देवालयात 5 जण. 
मरगुबाई देवालयात 5 जण
 आणि 50 स्वयंसेवक व ग्रामपंचायत कर्मचारी, पोलिस पाटील, ग्रामसेवक, सरपंच, तलाठी व कोतवाल, हे गावात येणाऱ्या पाहुण्यांच्याकडून सक्तीने  दंड वसूल करतील. 

हुकुमावरून 

कोरोना दक्षता समिती व ग्रामपंचायत म्हसवे

हे पण वाचा - सोमवारपासून कोल्हापुरात लाॅकडाऊची अफवाच..

 हे पण वाचा -  धक्कादायक : करवीर तालुक्यात कोरोनाचे 5 पाॅझिटिव्ह ; कम्युनिटी स्प्रेड झाल्याचा संशय