Sanjay Patil : काँग्रेस आमदारासह 'हा' नेता भाजपात प्रवेश करणार; माजी आमदारानं फोडला राजकीय बॉम्ब

बेळगाव : कर्नाटकात विधानसभा निवडणुकीच्या पार्श्वभूमीवर राज्यातलं राजकारण चांगलंच तापलंय. त्यातच आता भाजपच्या माजी आमदारानं मोठा गौप्यस्फोट केलाय. काँग्रेस (Congress) हे बुडणारं जहाज आहे. तर, भाजप हा उगवता सूर्य आहे. सर्वजण उगवत्या सूर्यासमोर नतमस्तक होतात. बुडत्या जहाजावर कोणीही चढत नाही, असं स्पष्ट मत माजी आमदार संजय पाटील यांनी व्यक्त केलंय.

काँग्रेस आमदार लक्ष्मी हेब्बाळकर (Lakshmi Hebbalkar) आणि त्यांचे बंधू चन्नराज हट्टीहोळी (Channaraj Hattiholi) हे दोघंही लवकरच भाजपमध्ये (BJP) प्रवेश करणार असल्याचं समजतं, असं सांगत माजी आमदार संजय पाटील (Sanjay Patil) यांनी पत्रकार परिषदेत राजकीय बॉम्ब टाकलाय.

काँग्रेस एमएलसी चन्नराज हट्टीहोळी यांनी बेळगावचे काही भाजप नेते काँग्रेसमध्ये प्रवेश करणार असल्याचं सांगितलं होतं. त्यावर शनिवारी बेळगावात प्रतिक्रिया देताना भाजपचे माजी आमदार संजय पाटील यांनी, लक्ष्मी हेब्बाळकर आणि चन्नराज हट्टीहोळी हे दोघंही भाजपमध्ये प्रवेश करणार असल्याचं वृत्त असल्याचं सांगितलं. भाजप हा उगवता सूर्य आहे, तर काँग्रेस हे बुडणारं जहाज आहे, बुडत्या जहाजावर कोणीही चढणार नाही. त्यामुळं पक्षात कोणाचा समावेश करायचा याचा निर्णय भाजप हायकमांड घेईल, असं सांगत त्यांनी नवा बॉम्ब फोडला आहे.