व्यवसाय अभ्यासक्रमासाठी जुलैमध्ये सीईटी: उदय सामंत

सांगली : कोरोनाच्या covid 19 साथीमुळे दहावी-बारावीच्या परीक्षा रद्द करण्यात आल्या. अशा परिस्थितीत दहावी-बारावीच्या विद्यार्थ्यांचे नुकसान होणार नाही, याबाबत दक्षता घेतली आहे. बारावीनंतरच्या व्यवसाय अभ्यासक्रमासाठी जुलैमध्ये सीईटी परीक्षा (CET exam)घेतली जाईल, त्याचा निकाल ऑगस्टमध्ये लागेल, अशी माहिती उच्च व तंत्रशिक्षण मंत्री उदय सामंत (Higher and Technical Education Minister Uday Samant)यांनी आज येथे पत्रकार परिषदेत दिली. जिल्ह्यात योग्य नियोजन केल्याने कोरोनाची दुसरी लाट ओसरली आहे. मात्र, तिसरी लाट थोपवण्यासाठी प्रयत्न करावेत, असे आवाहन त्यांनी यावेळी केले. जिल्हाधिकारी कार्यालयात शिवसेनेतर्फे १४ व्हेंटिलेटर वाटप व जिल्ह्यातील कोरोना परिस्थितीचा आढावा घेण्यासाठी उच्च व तंत्रशिक्षण मंत्री सामंत सांगलीत आले होते. त्यानंतर त्यांनी पत्रकारांशी संवाद साधला.(post-secondary-business-course-cet-exam-in-july-information-higher-and-technical-education-minister -uday-samant-sangli-news)

सामंत म्हणाले, ‘दहावी-बारावीच्या परीक्षा जाहीर झाल्यावर कोरोना रुग्ण वाढल्याने परीक्षा रद्द केल्या. त्यांचे नुकसान होणार नाही, याची दक्षता घेतली आहे. बारावीनंतरचा व्यवसाय अभ्यासक्रम महत्त्वाचा असतो. व्यवसाय अभ्यासक्रमाच्या प्रवेशासाठी जुलैत सीईटी आणि ऑगस्टमध्ये निकाल लावण्याचा प्रयत्न सुरू आहे. दहावीनंतर त्यांना थेट पॉलिटेक्निकला प्रवेश देण्यात येईल. दहावीसह कोणत्याही विद्यार्थ्यांचे शैक्षणिक नुकसान होणार नाही, याबाबत खबरदारी शासन घेत आहे. कोरोना दुसऱ्या लाटेत सांगली जिल्ह्यात कोरोनाची रुग्णसंख्या अडीच हजारांपर्यंत गेली होती. प्रशासन, नागरिकांच्या सहकार्यामुळे ६०० पर्यंत रुग्णसंख्या घटली. आरोग्य, महसूल, पोलिस सरपंच आणि लोकप्रतिनिधींनी हातात हात घालून कामामुळे दुसरी लाट रोखण्यात यश आले. यामुळे जिल्ह्याच्या जनतेचे मुख्यमंत्र्यांच्या वतीने आभार मानतो. येत्या काही महिन्यांमध्ये तिसरी लाट रोखण्यासाठी जिल्ह्याने आतापासून उपाययोजना कराव्यात.’

हेही वाचा- टास्क फोर्सच्या प्रोटोकॉल नुसार कोविड रुग्णांवर उपचार करा : जिल्हाधिकाऱ्यांचे आवाहन

वादळाच्या मदतीत केंद्राचा दुजाभाव

सामंत म्हणाले, तौक्ते वादळाने कोकणाचे मोठे नुकसान झाले. त्याचवेळी गुजरातलाही फटका बसला. पंतप्रधानांनी गुजरातची हवाई पाहणी करून तत्काळ १००० कोटींची मदत दिली. राज्याला रुपायाही दिला नाही. हा केंद्राचा दुजाभाव आहे. राज्य सरकारने मात्र एनडीआरएफच्या निकषापेक्षा चारपटीने म्हणजे २५२ कोटी मदत दिली. वादळानंतर २० दिवसांनी केंद्रीय पथक कोकणात आले. पाहणीपेक्षा त्यांनी माशांवर ताव मारला. नाणार प्रकल्प यापूर्वीच मुख्यमंत्र्यांनी रद्द केला आहे. तो प्रकल्प होणार नाही. प्रकल्प रद्द केल्यामुळे शिवसेनेला त्याचा फटका बसणार, अशी टीका विरोधकांकडून होत आहे. मात्र, चार महिन्यांपूर्वी झालेल्या ग्रामपंचायत निवडणुकांमध्ये बहुतांशी ग्रामपंचायतीतील शिवसेनेने जिंकल्या आहेत. त्यामुळे तेथील लोक सेनेच्या पाठीशी असल्याचे स्पष्ट झाले आहे.