Jayant Patil : 'पृथ्वीतलावर माझ्या नावे घरच नाही! रात्री शांत झोप लागते, ED ला सामोरे जायला तयार'

नेर्ले : पृथ्वीतलावर माझ्या स्वतःच्या नावाचं एकही घर नाही. मी प्रामाणिकपणे कामावर भर देणारा माणूस आहे. त्यामुळं ईडीची (ED) चौकशी होत असताना तिला सामोरे जायला तयार आहे, अशी भूमिका राष्ट्रवादीचे प्रदेशाध्यक्ष आमदार जयंत पाटील (Jayant Patil) यांनी मांडली.

नेर्ले (ता. वाळवा) येथील नंबर दोन सर्व सेवा सोसायटीच्या नूतन इमारतीचं उद्घाटन पाटील यांच्या हस्ते झालं, त्यावेळी ते बोलत होते. राजारामबापू साखर कारखान्याचे अध्यक्ष प्रतीक पाटील, जिल्हा परिषदेचे माजी अध्यक्ष देवराज पाटील, सरपंच संजय पाटील, सोसायटीचे अध्यक्ष दिलीप पाटील, उपाध्यक्ष पोपट कदम, महाराष्ट्र केसरी आप्पासाहेब कदम, मिरज बाजार समितीचे संचालक जयवंत नलवडे उपस्थित होते.

जयंत पाटील म्हणाले, "लोकांसमोर मान खाली घालायला लागेल, अशा प्रकारचं कृत्य माझ्याकडून आजपर्यंत झालेलं नाही. इथून पुढे देखील होणार नाही. सध्या जे चाललं आहे, त्याच्या विरोधी भूमिका आपण घेतोय. त्यांचं सरकार आहे, त्यांना जे करायचं ते करू देत. पृथ्वीतलावर माझं स्वतःचं घर नाही. सांगलीचं घर बापूंच्या नावावर होतं. ते आईच्या नावावर झालं. आता माझ्या नावावर करण्याचा प्रयत्न सुरू आहे. कासेगावमध्ये थोडीफार शेतजमीन आहे. त्यात वाटणी झाली आहे. मी कोणाकडून पैसे घेतले नाहीत. त्यामुळं मला रात्री शांत झोप लागते."

आमदार मानसिंगराव नाईक म्हणाले, "सोसायटी व सांगली जिल्हा मध्यवर्ती बँकेने अनेक वर्षांपासून शेतकऱ्यांच्या जीवनाला कलाटणी देण्याचं काम केलं आहे. सोसायटी शेतकऱ्यांच्या पाठीशी खंबीरपणे उभी आहे. " नेर्लेचे सरपंच संजय पाटील यांनी आमदार जयंत पाटील यांना बजावलेल्या ईडीच्या नोटिसीचा निषेध नोंदवला. दिलीप पाटील यांनी स्वागत केलं. विजय लोहार यांनी सूत्रसंचालन केलं. महेश पाटील यांनी आभार मानले.

उपसरपंच महेश पाटील, शरद बल्लाळ, शैलाजा पाटील, मनीषा गडाळे, मंगल पोळ, दीपक माने, अनिल साळुंखे, राणी जामदार, भारती रोकडे, मनीषा माने, जयश्री कुंभार, कुमार माने, किरण पाटील, सहकार बोर्डाचे संचालक दिलीप पाटील, आनंदराव नलवडे, भालचंद्र पाटील, सुरगौंडा पाटील, बाबासाहेब पाटील उपस्थित होते.