सरपंचाचा गोळी झाडून खून

पाथर्डी (नगर) ः राजकीय वादातून दैत्यनांदूरचे सरपंच संजय बाबासाहेब दहिफळे (वय 52) यांचा पिस्तुलातून गोळी झाडून खून करण्यात आला. या घटनेत अन्य चौघे गंभीर जखमी झाले आहेत. दैत्यनांदूर गावातील बसथांब्याजवळ आज सायंकाळी साडेसहाच्या सुमारास ही घटना घडली. राजकीय वादातून दोन गटांत धुमश्‍चक्री झाल्याचेही समजते. 

सरपंच दहिफळे व गावातील निवृत्त जवानाचे राजकीय मतभेद होते. त्यांच्यात नेहमी शाब्दिक खटके उडत. आज सायंकाळी साडेसहाच्या सुमारास बसथांबा चौकात दोन्ही गटांचे कार्यकर्ते समोरासमोर आले. त्यांनी एकमेकांवर काठ्या-कुऱ्हाडींनी वार केले. त्यामध्ये दोन्ही गटांचे काही कार्यकर्ते जखमी झाले. 

हेही वाचा -  कुणी नकोसे तर कुणाचे हरपले छत्र

दहिफळे यांच्याविरोधी गटातील एकाने पिस्तुलातून गोळी झाडली. ती सरपंच दहिफळे यांच्या छातीत घुसली. त्यांना तातडीने पाथर्डीच्या उपजिल्हा रुग्णालयात दाखल करण्यात आले. मात्र, गंभीर जखमी असल्याने प्राथमिक उपचार करून त्यांना नगरच्या दवाखान्यात पाठविण्यात आले. मात्र तेथील डॉक्‍टरांनी दहिफळे यांचा मृत्यू झाल्याचे सांगितले. 

हेही वाचा - स्नेहसंमेलनातून शाळांची "दुकानदारी' 
 

सदाशिव अर्जुन दहिफळे (वय 50), ज्ञानेश्वर अशोक दहिफळे (वय 30), भीमराज जिजाबा दहिफळे (वय 60), अशी अन्य जखमींची नावे आहेत. त्यांच्यावरही पाथर्डीच्या उपजिल्हा रुग्णालयात उपचार सुरू आहेत. सदाशिव दहिफळे यांचीही प्रकृती गंभीर असल्याने त्यांनाही नगरला हलविण्यात आले. 

संजय दहिफळे यांच्याविरोधी गटातील शहादेव पंढरीनाथ दहिफळे, विष्णू दहिफळे आणि द्वारकाबाई नागरगोजे हेही जखमी असून, त्यांना जिल्हा रुग्णालयात दाखल करण्यात आले आहे. राजकीय वादासोबतच भाऊबंदकीचा वादही याला कारणीभूत असल्याचे समजते. पोलिसात याबाबत कोणतीही तक्रार दाखल नाही.