शेगाव गोळीबारातील चार आरोपींचा जामीन नाकारला 

सोलापूर : बैल पोळ्याच्या (कर्नाटकी बेंदूर) मानपानावरून चुलत भाऊ पिंटू ऊर्फ अण्णाराव बाबूराव पाटील याने महादेव ऊर्फ सुरेश अण्णाराव पाटील यांच्यावर शेगाव (ता. अक्‍कलकोट) येथे गोळीबार केला. त्यामध्ये महादेव पाटील यांचा मृत्यू झाला. या प्रकरणात एकूण 12 आरोपींविरुद्ध पोलिसांत गुन्हा दाखल असून त्यापैकी सहा आरोपींनी जामिनासाठी न्यायालयात अर्ज केले होते. त्यापैकी हणमंत पाटील, जगदेव पाटील, मोरत्याप्पा पाटील, रमेश पाटील यांचे जामीन अर्ज न्यायालयाने फेटाळून लावले. 

हेही आवश्‍य वाचाच : अरेच्चा...पहिल्याच कार्यक्रमाला या पालकमंत्र्यांची दांडी 

शेगाव गोळीबार प्रकरणातील आरोपी हे सराईत गुन्हेगार असून त्यांच्याविरुद्ध गंभीर स्वरूपाचे गुन्हे दाखल आहेत. त्यांना जामीन मिळाल्यास साक्षीदारांच्या जीवितास धोका असून तपासात अडथळा येण्याची शक्‍यता आहे. घटनेच्या दिवशीचे सीसीटिव्ही फुटेजही मिळवायचे असल्याचा युक्तिवाद जिल्हा सरकारी वकील प्रदीपसिंह रजपूत यांनी न्यायालयासमोर केला. त्यांचा युक्तिवाद ग्राह्य धरून न्यायालयाने चौघांचा जामीन फेटाळला. तर चिदानंद बिराजदार, श्रीधर कोळी यांना जामीन मंजूर केला. या प्रकरणात आरोपीतर्फे ऍड. मिलिंद थोबडे, ऍड. फताटे यांनी काम पाहिले. 

हेही आवश्‍य वाचाच : सोलापूरच्या 'महाविकास'मधून शिवसेना निसटली 

ऑनलाइन फसवणुकी प्रकरणी 
राजस्थानच्या बाप-लेकीस पोलिस कोठडी 
सोलापूर, ता. 10 : क्राउंडफिंच सायबर नेटीक्‍स प्रायव्हेट लिमिटेड, जयपूर या कंपनीचे मालक मनिषकुमार नरेंद्रपाल कक्‍कर व नरेंद्रपाल पृथ्वीराज कक्‍कर यांनी विश्‍वासात घेऊन स्वराज्य पे डॉट कॉम या नावाने डोमेन देवून सोलापुरातील सुनील शिवाजी पवार (रा. हनुमान नगर, भवानी पेठ) यांची सात लाख 99 हजारांची फसवणूक केली. या प्रकरणी आरोपींना न्यायदंडाधिकारी एम. एम. बावरे यांनी 13 जानेवारीपर्यंत पोलिस कोठडी सुनावली. 
ऑनलाइन लाईटबील, मोबाईल व डिश रिचार्ज, विमा पेमेंट, पोस्टपेड बिल, लॅण्डलाईन फोन बिलद्वारे स्वराज्य पे डॉट कॉमवर पैशाचा भरणा केला. परंतु, आरोपींनी ती रक्‍कम संबंधित विभागास न भरता स्वत:कडेच ठेवली, अशी फिर्याद श्री. पवार यांनी जोडभावी पोलिसांत दिली. त्यानुसार 9 जानेवारीला पोलिसांना आरोपींना ताब्यात घेतले. त्यानंतर त्यांना न्यायालयासमोर उभे केले असता न्यायालयाने पोलिस कोठडी ठोठावली. या प्रकरणात सरकारतर्फे ऍड. एस. डी. देवमाने यांनी तर आरोपीतर्फे ऍड. अभिषेक गुंड यांनी काम पाहिले. 

हेही आवश्‍य वाचाच : सोलापूर शहर व जिल्ह्यातील 36 केंद्रांवर होणार चित्रकला स्पर्धा 

बचत गटाच्या पैशावरून जीवे मारण्याचा प्रयत्न 
बचत गटाच्या पैशाच्या कारणावरून बेकायदेशीर जमाव जमवून दगडाने, हाताने व लाथाबुक्‍क्‍यांनी मारहाण केल्याची फिर्याद पद्मावती अशोक पासकंटी (रा. कलावतीनगर, एमआयडीसी अक्‍कलकोट रोड) यांनी एमआयडीसी पोलिसांत दिली आहे. सरोजिनी व्हरकेरी यांच्या घरासमोरील रोडवर ही घटना घडली असून या मारहाणीत मुलगा किसन याच्या फुफ्फुसाला गंभीर दुखापत झाल्याचे फिर्यादीत नमूद करण्यात आले आहे. त्यानुसार नागमणी आमंची, संजीव अलकुंटे, लक्ष्मण अलकुंटे, देवू अलकुंटे, शिवराज पवार व त्यांच्यासमवेत आलेल्या दोन अनोळखी मुलांवर गुन्हा दाखल करण्यात आला आहे.