ग्रामीणमध्ये 36 दिवसांत 1055 मृत्यू! शहरातील परिस्थिती आली आटोक्‍यात

सोलापूर : शहरातील कोरोनाची (Corona) दुसरी लाट आटोक्‍यात येत असतानाच ग्रामीण (rural areas) भागातील मृतांची (corona deaths) संख्या अजूनही चिंताजनक आहे. प्रामुख्याने अक्‍कलकोट, उत्तर सोलापूर, मोहोळ, माळशिरस या तालुक्‍यात सर्वाधिक मृत्यूचे प्रमाण आहे. मागील 36 दिवसांत तब्बल एक हजार 55 रुग्णांचा मृत्यू झाला असून, शनिवारी (ता.5) पाच जणांचा कोरोनाने बळी घेतला आहे. शहरात शनिवारी 15 तर ग्रामीणमध्ये 460 रुग्णांची वाढ झाली आहे. शहरातील एकाही रुग्णाचा मृत्यू झाला नसून, ग्रामीणमधील मात्र 23 रुग्ण कोरोनामुळे दगावले आहेत. (corona deaths are on the rise in rural areas of solapur district)

कोरोनाच्या पहिल्या व दुसऱ्या लाटेत आतापर्यंत संपूर्ण जिल्ह्यात एक लाख 54 हजार 290 जणांना कोरोनाची बाधा झाली. त्यापैकी एक लाख 45 हजार 705 रुग्ण बरे होऊन घरी परतले आहेत. सध्या चार हजार 490 रुग्णांवर उपचार सुरू असून चिंतेची बाब म्हणजे कोरोनाने शहर-जिल्ह्यातील चार हजार 95 रुग्णांचा आतापर्यंत बळी घेतला आहे. शनिवारी अक्‍कलकोट तालुक्‍यात 20 रुग्ण वाढले असून तब्बल पाच रुग्ण दगावले आहेत. बार्शीत 53, माळशिरसमध्ये सर्वाधिक 107, मोहोळमध्ये 23, उत्तर सोलापुरात तीन रुग्ण वाढले असून या तालुक्‍यांतील प्रत्येकी चार रुग्णांचा कोरोनाने बळी घेतला आहे. सांगोल्यात 27 रुग्ण वाढले असून दोन रुग्णांचा मृत्यू झाला आहे. दिलासादायक बाब म्हणजे करमाळा, माढा, पंढरपूर, मंगळवेढा, दक्षिण सोलापूर या तालुक्‍यातील एकाही रुग्णाचा शनिवारी मृत्यू झाला नाही. रुग्णसंख्या कमी होत असतानाही मृत्यूदर कायम असल्याने प्रशासनाची चिंता वाढली आहे. प्रशासनाकडून मृत्यू रोखण्यासाठी ठोस पावले उचलली जात नसल्याचे चित्र आहे.

शहरातील 24 नंबर प्रभागाकडे लक्ष द्या?

शहरातील कोरोनाची लाट आटोक्‍यात येत असून, रुग्णसंख्या दोन अंकी झाली आहे. शनिवारी शहरातील एकूण 26 प्रभागांमध्ये 15 रुग्ण वाढले असून त्यातील सर्वाधिक चार रुग्ण प्रभाग क्र. 24 मधील आहेत. प्रभाग क्र. 20, 25 व 26 मध्ये प्रत्येकी दोन तर प्रभाग क्र. 3,5,14,16 व 22 मध्ये प्रत्येकी एक रुग्ण वाढला आहे. शहरातील बहुतेक प्रभाग कोरोनामुक्‍त होत असतानाच 22 ते 26 या प्रभागांमध्ये ठोस उपाययोजना करून त्याठिकाणचे रुग्ण कमी करण्याची गरज आहे. तरीही प्रशासनाकडून त्याकडे लक्ष दिले जात नसल्याची वस्तूस्थिती आहे.

म्युकरमायकोसिसचे वाढले 12 रुग्ण

कोरोनाच्या संकटातून बाहेर पडत असतानाच आता म्युकरमायकोसिस या आजाराच्या नव्या संकटाने प्रशासनाची चिंता पुन्हा वाढली आहे. 8 मेनंतर शहर-जिल्ह्यात 395 रुग्ण आढळले असून त्यातील 29 जणांचा मृत्यू झाला आहे. तर 114 रुग्ण बरे झाले असून 222 रुग्णांवर 31 रुग्णालयातून उपचार सुरू आहेत. आज 12 रुग्ण वाढले आहेत. (corona deaths are on the rise in rural areas of solapur district)