निरा नदीत सोडले पाणी! नदीकाठच्या गावांना सतर्कतेचा इशारा

लवंग (सोलापूर) : नीरा खोऱ्यातील नीरा देवधर, भाटघर, गुंजवणी आणि वीर धरणाच्या पाणलोट क्षेत्रात गेल्या पाच सहा दिवसांपासून पावसाने दमदार हजेरी लावल्याने नीरा-देवघर धरणातून पाणी सोडण्यात आले.

देवघर धरणातून सोडलेले पाणी वीर धरणात येत असल्याने वीर धरणाच्या प्रशासनाने धरणातील पाणीसाठा नियंत्रित ठेवण्याच्या दृष्टीने शनिवार सकाळी 6 वाजल्यांपासून वीर धरणातून नीरा नदीत 21 हजार 505 क्‍युसेक्‍सने पाणी सोडण्यास सुरवात केली आणि त्यानंतर पाण्याचा प्रवाह वाढल्याने दुपारी दोन वाजता 22 हजार 530 क्‍युसेक्‍सने पाणी सोडले जात होते. दरम्यान, प्रशासनाने नदीकाठच्या लोकांना सतर्कतेचा इशारा देऊन सावधगिरी बाळगण्याचा सूचना दिल्या आहेत.

नीरा देवघर, भाटघर, आणि गुंजवणी धरण भरल्यानंतर या धरणांचे पाणी वीर धरणात येते. त्यामुळे या वरील धरणातून येणाऱ्या पाण्याचा अंदाज घेऊन वीर धरणातून नीरा नदीत पाणी सोडले जाते. योग्य पाणी पातळी ठेवून नीरा नदीत पाणी सोडले जाते. त्याच बरोबर निरा डावा व उजव्या कालव्यातून कालव्यावर अवलंबून असलेल्या पाण्याचे तलाव भरून घेण्यासाठी पाणी सोडले जाते.

सोलापूर जिल्ह्यातील माळशिरस, पंढरपूर व सांगोला तालुक्‍यातील तलाव भरून घेतले जातात. यंदा गतवर्षीच्या तुलनेत चार धरणातील एकत्रित पाणी साठा पाहिला तर गतवर्षी पेक्षा आजचे दिवशी सुमारे 33 टक्के जादा पाण्याची आवक झाली आहे. नीरा उजवा कालव्यावरील सातारा जिल्ह्यातील फलटण, सोलापूर जिल्ह्यातील माळशिरस, पंढरपूर, सांगोला तालुके आणि डाव्या कालव्यावरील बारामती, इंदापूर तालुक्‍यातील शेतकरी वर्गात समाधान व्यक्त केले जात असून आनंदाचे वातावरण निर्माण झाले आहे.

24 जुलै सकाळी सहा वाजेपर्यंत धरणातील पाणीसाठा खालील प्रमाणे

निरा देवघर धरणातील पाणीसाठा...

प्रकल्पीय उपयुक्त पाणीसाठा क्षमता - 11"73 टीएमसी.

आजपर्यंत पडलेला पाऊस - 1391 मी.मी.

धरणात झालेला पाणीसाठा 9 "26 टीएमसी आजची टक्केवारी 78" 91 टक्के.

गतवर्षीची टक्केवारी 23 " 88 टक्के

भाटघर धरणातील पाणीसाठा....

प्रकल्पीय उपयुक्त पाणीसाठा क्षमता -23"50 टीएमसी.

आजपर्यंत पडलेला पाऊस 401 मि.मी.

धरणात झालेला पाणीसाठा 12" 68 टीएमसी.

आजची टक्केवारी 53 " 93 टक्के.

गतवर्षी ची टक्केवारी 38" 02 टक्के.

गुंजवणी धरणातील पाणीसाठा....

प्रकल्पीय उपयुक्त पाणीसाठा क्षमता-3"69 टीएमसी.

आजपर्यंत पडलेला पाऊस - 1083 मि.मी. धरणात झालेला पाणीसाठा - 2 " 92 टीएमसी. आजची टक्केवारी- 79" 14 टक्के.

गतवर्षीची टक्केवारी - 50"46 टक्के.

वीर धरणातील पाणीसाठा...

प्रकल्पीय उपयुक्त पाणीसाठा क्षमता- 9"41 टीएमसी.

आजपर्यंत पडलेला पाऊस - 236 मि.मी. धरणात झालेला पाणीसाठा - 8.31 टीएमसी. आजची टक्केवारी - 88"29 टक्के.

गतवर्षीची टक्केवारी 38 " 88 टक्के.