Solapur Auto Fare Hike : रिक्षांचा प्रवास सोलापुरात ९ ऑक्टोबरपासून महागणार रात्री २५ ते ४० टक्के अतिरिक्त भाडे; मीटर कॅलिब्रेशनसाठी ८ डिसेंबरची मुदत

सोलापूर : नवीन दरानुसार तीन आसनी ऑटोरिक्षासाठी पहिल्या १.५ किलोमीटरसाठी ३० रुपये, तर त्यानंतर प्रत्येक १ किलोमीटरसाठी किमान देय भाडे २० रुपये राहणार आहे. ऑटोरिक्षा भाडेदर ९ ऑक्टोबरपासून लागू करण्याचा निर्णय जिल्हाधिकारी तथा प्रादेशिक परिवहन प्राधिकरणाचे अध्यक्ष एस. कार्तिकेयन यांच्या अध्यक्षतेखाली झालेल्या बैठकीत घेण्यात आला आहे.

महापालिका क्षेत्रातील रिक्षांसाठी रात्री १२ ते सकाळी ५ या कालावधीत २५ टक्के अतिरिक्त भाडे, तर महापालिका क्षेत्राबाहेरील ग्रामीण भागाकरिता रात्री १० ते सकाळी ५ या कालावधीत ४० टक्के अतिरिक्त भाडे आकारण्यास मंजुरी देण्यात आली आहे. ऑटोरिक्षामधून प्रवाशांसोबत असलेल्या ६० बाय ४० सें.मी. आकाराच्या किंवा त्यापेक्षा मोठ्या सामानासाठी ५ रुपये शुल्क आकारता येणार आहे.

सुधारित भाडेदरानुसार इलेक्ट्रॉनिक मीटर बसविणे सर्व ऑटोरिक्षा चालक-मालकांना बंधनकारक करण्यात आले आहे. मीटर कॅलिब्रेशनसाठी ८ डिसेंबरपर्यंत ६० दिवसांची मुदत देण्यात आली आहे. त्यानंतर दंडात्मक कारवाई करण्यात येणार आहे. दरम्यान, प्रादेशिक परिवहन प्राधिकरणाकडून तात्पुरते टेरिफ कार्ड तयार करण्यात येणार असून, ते ८ डिसेंबरपर्यंत वैध राहणार आहे. प्रवाशांच्या सोयीसाठी सर्व ऑटोरिक्षांमध्ये UPI QR Code आणि हेल्पलाइन क्रमांक १४२०६४६४२३ दर्शनी भागात बसविणे बंधनकारक करण्यात आले आहे.

शेअर ए रिक्षा योजनेलाही मंजुरी छत्रपती शिवाजी महाराज चौक आणि सोलापूर रेल्वे स्टेशन या दोन ठिकाणांपासून शेअर ए रिक्षा योजना ९ ऑक्टोबरपासून सुधारित भाडेदरानुसार कार्यान्वित करण्याचा निर्णय घेण्यात आला आहे. ७९ नवीन ऑटोरिक्षा थांब्यांच्या प्रस्तावांपैकी ६१ थांब्यांना मान्यता देण्यात आली आहे. उर्वरित १८ प्रस्ताव अपुरी जागा, नियोजित ठिकाणी थांबे न आढळणे, वाहतुकीस अडथळा आणि महापालिका हद्दीत समाविष्ट नसणे आदी कारणांमुळे नाकारण्यात आले आहेत. मान्यता दिलेल्या ६१ थांब्यांवर महापालिकेने बोर्ड लावून, त्यामध्ये रिक्षांची संख्या नमूद करण्याच्या सूचना देण्यात आल्या आहेत.