विषय समितींच्या निवडी "या' कारणामुळे चौथ्यांदा लांबणीवर 

श्रीरामपूर : सलग तीन वर्षे निवड रद्द झाल्यानंतर येथील पालिकेच्या विषय समित्यांच्या निवडी गटनेत्याअभावी आजही चौथ्यांदा होऊ शकल्या नाहीत. सत्ताधारी गटाने 25 नगरसेवकांची यादी दिल्यानंतरही गटनेताच नसल्याने यंदाही निवडी झाल्या नाहीत. 

अवश्‍य वाचा- इंटर्नल मार्क हवेत, तर शरीरसंबंध ठेव.. 

पीठासीन अधिकारी तथा प्रांताधिकारी अनिल पवार यांच्या अध्यक्षतेखाली आज विषय समिती सदस्य निवडीसाठी बैठक झाली. सत्ताधारी महाआघाडीने नगरसेवक राजेंद्र पवार यांनी 10, तर कॉंग्रेसच्या एका गटाचे सुभाष ऊर्फ बाळासाहेब गांगड यांनी 15 सदस्यांची यादी सादर केली होती. विरोधी कॉंग्रेसच्या एका गटाचे संजय फंड व भाजपच्या भारती कांबळे यांनी गटनेतेपदाचा वाद उच्च न्यायालयात न्यायप्रविष्ट असल्याने निवडीचा कार्यक्रम स्थगित ठेवावा, असे स्वतंत्र अर्ज सादर केले. 

गटनेतेपदाचा वाद न्यायप्रविष्ट 

गटनेत्याने सदस्यांची यादी सादर केल्यानंतर, सदस्यसंख्येनुसार सभापती व सदस्यांची निवड होते; परंतु गटनेत्याची नोंदणी नसल्याने, तसेच गटनेतेपदाचा वाद न्यायप्रविष्ट असल्याने समित्यांची निवड होऊ शकत नसल्याचे पवार यांनी स्पष्ट केले. विषय समित्यांच्या निवडीच्या पार्श्वभूमीवर माजी मंत्री राधाकृष्ण विखे पाटील यांनी दोन दिवसांपूर्वी नगरसेवकांची बैठक घेऊन समेट घडवून आणला होता. 

हेही वाचा- अकोल्यातील ग्रामपंचायतीतील गैरव्यवहार, तीन अधिकारी दोषी 

सत्ताधारी गटाचा हिरमोड 

सत्ताधारी गटाकडे 25 सदस्यसंख्या झाल्याने, विनासायास निवडी होतील, असे चित्र होते. मात्र, गटनेता म्हणून नोंद नसल्याने निवडी होऊ शकत नसल्याचे सांगत पीठासीन अधिकारी पवार यांनी बैठक संपल्याचे जाहीर केले. त्यामुळे सत्ताधारी गटाचा हिरमोड झाला. या निर्णयाविरोधात सत्ताधारी गटाकडून कायदेशीर बाबींची पडताळणी करून निर्णय घेणार असल्याचे नगरसेवक राजेंद्र पवार यांनी सांगितले. 

फुटीर सदस्यांना सभापतिपदाची स्वप्ने

पालिका विषय समित्यांची ही निवडणूक नसून, निवडीचा कार्यक्रम आहे. दोन दिवसांपासून सत्ताधारी आदिक व कॉंग्रेसच्या फुटीर सदस्यांना सभापतिपदाची स्वप्ने पडत होती; परंतु पीठासीन अधिकाऱ्यांच्या निर्णयाने त्यांच्या मनसुब्यावर पाणी फेरले गेले. काही स्वार्थी लोकांनी वेगळी चूल मांडत सत्ताधाऱ्यांना साथ दिली. लोकसभा, विधानसभेनंतर त्यांच्यासह आदिक गटाला हा तिसरा धक्का आहे. महसूलमंत्री बाळासाहेब थोरात व विखे यांचा या निवडीशी संबंध नाही. 
- करण ससाणे, उपनगराध्यक्ष