पिंपरी-चिंचवड : महापालिका शिक्षकांना अखेर सातवा वेतन आयोग लागू 

पिंपरी : गेल्या वर्षापासून प्रलंबित सातवा वेतन आयोग अखेर महापालिका प्राथमिक  शिक्षकांना लागू झाला. या सातवा वेतन आयोग लागू करण्याच्या आदेशावर मंगळवारी (ता.14) आयुक्त श्रावण हर्डीकर यांनी स्वाक्षरी केली. त्यामुळे शिक्षकांमध्ये आनंदाचे वातावरण आहे. 

ताज्या बातम्यांसाठी डाऊनलोड करा ई-सकाळचे ऍप 

पिंपरी-चिंचवडच्या बातम्या वाचण्यासाठी येथे ► क्लिक करा

सरकारचा निर्णय ऑगस्ट 2019 मध्ये होऊनही काही त्रृटींमुळे शिक्षकांना वेतन आयोगाचा लाभ मिळत नव्हता. 2 फेब्रुवारी 2020 रोजी  प्राथमिक शिक्षकांना आयोग लागू करण्याचा आदेश निर्गमित करण्यात आला होता. परंतु, तांत्रिक अडचणीमुळे पुन्हा महापालिकास्तरावर विलंब होत गेला. अखेर शासन निर्णयातील त्रुटीची दुरुस्ती वा शुद्धीपत्रक शासनाकडून सद्य:स्थितीत होण्याचे चिन्ह दिसत नसल्याने आज पदवीधर शिक्षक संघटनेच्या पदाधिकाऱ्यांसमवेत आमदार लक्ष्मण जगताप व आमदार महेश लांडगे यांच्या मध्यस्थीने आयुक्तांच्या दालनात बैठक झाली. त्यात सध्या कार्यरत व सेवानिवृत्त साधारणतः दीड हजार शिक्षकांच्या वेतनश्रेण्या पडताळणी करून आयोग लागू करण्याचा निर्णय होऊन आदेशावर आयुक्तांची स्वाक्षरी झाली. महापालिका कर्मचाऱ्यांना जूनचे वेतन आयोगाप्रमाणे मिळाले आहे.

पिंपरी-चिंचवड पोलिसांकडून कडेकोट बंदोबस्ताचा नुसताच गाजावाजा; प्रत्यक्षात मात्र...

यासाठी महापौर उषा ढोरे व सत्तारुढ पक्षनेते नामदेव ढाके यांनीही पाठपुरावा केला होता. दरम्यान, कोरोना संशयितांच्या सर्वेक्षणाचे कामही शिक्षक करीत आहेत. या निर्णयामुळे शिक्षकांना आनंद झाला. कोरोना विषाणूचा  प्रादुर्भाव लक्षात घेता महापालिकेने कर्मचाऱ्यांसाठी घेतलेला निर्णय अतिशय उपयुक्त असल्याची प्रतिक्रिया शिक्षकांनी व्यक्त केल्या.

या संघटनांनी केला पाठपुरावा

पदवीधर शिक्षक संघटना, शिक्षक संघ, शिक्षक परिषद, अनु.जाती जमाती संघटना आदींनी पाठपुरावा केला.

वेतन आयोग लागू करण्यासाठी कर्मचारी महासंघाच्या वतीने पाठपुरावा करण्यात आला. गेल्या महिन्यात पालिका कर्मचाऱ्यांना लागू झालेला आहे. त्यापाठोपाठ शिक्षकांना आयोग लागू केल्यामुळे महापालिका शिक्षकांमध्ये समाधानाचे वातावरण निर्माण झाले आहे.
- अंबर चिंचवडे, अध्यक्ष, कर्मचारी महासंघ महापालिका