राजेश खन्नांपासून वेगळं झाल्यावरही डिंपल कपाडियाने का केली नाही घटस्फोटाच्या कागदावर सही? पैसा नाही 'हे' होतं कारण

बॉलिवूडचे टॉप अभिनेते राजेश खन्ना आणि अभिनेत्री डिंपल कपाडिया यांची प्रेमकहाणी अगदीच निराळी आहे. चाहते अजूनही त्यांच्याबद्दल चर्चा करताना दिसतात. डिंपल राजेश यांच्यासोबत लग्नबंधनात अडकली तेव्हा ती फक्त १६ वर्षांची होती. तर काका ३१ वर्षांचे होते. त्यांचा संसार सुरू तर झाला मात्र तो फार काळ टिकू शकला नाही. लवकरच ते दोघे वेगळे झाले. डिंपल त्यांचं घर सोडून आपल्या वडिलांच्या घरी राहू लागली. मात्र असं असलं तरी त्यांनी एकमेकांना कधीच घटस्फोट नाही दिला. डिंपल घटस्फोटाच्या कागदांवर सही करायला तयार नव्हती त्यामागेही मोठं कारण होतं.

डिंपलने १९७३ मध्ये राजेश यांच्याशी लग्नगाठ बांधली. त्यानंतर तिचा 'बॉबी' हा चित्रपट प्रदर्शित झाला. त्यातून अभिनेत्रीला प्रचंड लोकप्रियता मिळाली. मात्र लग्नानंतर तिने एकाही चित्रपटात काम केलं नाही कारण राजेश खन्ना यांचा तिच्या काम करण्याला विरोध होता. तेव्हा आपल्या प्रेमासाठी तिने आपल्या करिअरवर पाणी सोडलं. काही वर्षातच डिंपल २ मुलींची आई झाली. मात्र आता राजेश खन्ना आणि टिना मुनीम यांच्या लिंकअपच्या चर्चांमुळे डिंपल अस्वस्थ राहू लागली. ती त्यांच्यासोबत मॉरिशिअसला शूटला देखील गेली होती. मात्र तिथे त्यांच्यातील जवळीक पाहून ती भारतात परत आली.

का केली नाही सही?

परत आल्यानंतर राजेश आणि डिंपल यांच्यात दुरावा आला तो कायमचा. डिंपल आशीर्वाद बंगला सोडून गेली मात्र तिने कधीही त्यांना घटस्फोट दिला नाही. त्यामागे कारण होतं मुलींचं भविष्य. राजेश यांनी मुलींच्या भविष्याची जबाबदारी घ्यावी असं तिला वाटत होतं. त्यांनी मुलींच्या आर्थिक सुरक्षेची जबाबदारी राजेश यांच्याकडे दिली होती मात्र राजेश हे मान्य करायला तयार नव्हते. घटस्फोट दिल्यानंतर राजेश आपल्या मुलींना वाऱ्यावर सोडतील अशी भीती वाटल्याने तिने कधीही घटस्फोटाच्या कागदांवर सही केली नाही. त्यामुळे ते कायम घटस्फोट न घेताच वेगळे राहिले.