अप्पू: द रिअल हिरो...पुनीत राजकुमार! | Sakal
sakal

बोलून बातमी शोधा

अप्पू: द रिअल हिरो...पुनीत राजकुमार!}

अप्पू: द रिअल हिरो...पुनीत राजकुमार!

सामाजिक बांधिलकी जपणारा दाक्षिणात्य चित्रपटसृष्टीतील सुपरस्टार पुनीत राजकुमार अचानक काळाच्या पडद्याआड गेला. टॉलीवूड अजूनही या धक्क्यातून सावरलेले नाही. कसदार अभिनयाच्या जोरावर त्याने तीन दशके प्रेक्षकांच्या हृदयावर अधिराज्य गाजवले. मृत्यूनंतर त्याच्या अखेरच्या दर्शनासाठी लाखोंच्या संख्येत सिनेप्रेमींनी केलेली गर्दी त्याच्यावर असलेल्या अतीव प्रेमाची साक्ष देते. श्रद्धांजली वाहण्यासाठी ११ दिवसानंतरही लाखो चाहत्यांची रांग पुनीतच्या स्मृतीस्थळी कायम होती. दीनदुबळ्यांसह, विद्यार्थी तसेच अनाथांसाठी त्याने उभारलेली माणुसकीची भिंत अन्‌ सामाजिक योगदानातून त्याने अनेकांचे जीवन सुखकर केले. 'अप्पू' नावाने ओळखल्या जाणाऱ्या या रिअल हिरोला महिना उलटला तरी कर्नाटकासह देशभरातील चाहत्यांकडून अश्रूंची सूमनांजली वाहिली जात आहे.


'अप्पू' या चित्रपटातून पदार्पण करणाऱ्या पुनीतने ३० चित्रपटांतून अभिनय साकारला. तो केवळ अभिनेताच नव्हता तर गायकही होता. कन्नड चित्रपट सृष्टीत तो सर्वाधिक मानधन घेणारा अभिनेता असल्याचे बोलले जाते. पुनीतच्या चित्रपटांचे गारुड केवळ टॉलीवूडवर होते, असे नाही तर ते बॉलीवूडवरही होते. त्याच्या हिंदी भाषेत डब झालेल्या चित्रपटांचा यूट्यूब तसेच इतर सोशल माध्यमांवर बोलबाला असतो. जिममध्ये व्यायाम करताना त्याला हृदयविकाराचा तीव्र झटका आला. केवळ ४५ व्या वर्षी पुनीतला मृत्यू कवेत घेईल, असे कोणाला स्वप्नात देखील वाटले नव्हते. बंगळुरूमधील विक्रम रुग्णालयात त्याने २९ ऑक्टोबर २०२१ रोजी अखरेचा श्‍वास घेत जगाचा निरोप घेतला. त्यामुळे देशभरातील राजकीय तसेच सिनेसृष्टीतील सेलिब्रिटींनी त्याच्या मृत्यूबद्दल हळहळ व्यक्त केली.

हेही वाचा: अमिताभ बच्चन : सहस्र आविष्कारांचा महानायक

चाहत्यांमध्ये पुनीत अप्पू व पॉवर हाऊस म्हणून कमालीचा लोकप्रिय होता. त्याच्या निधनानंतर कर्नाटक सरकारने राज्यात हाय अर्लट जाहीर केले तसेच सर्व चित्रपटगृहे बंद करण्याचा आदेश दिला. निधनाचे वृत्त समजताच मुख्यमंत्री बसवराज एस. बोम्मई यांनी रुग्णालयात धाव घेतली. त्याच्या अकाली निधनाने साऊथ फिल्म इंडस्ट्रीजच नव्हे तर बॉलीवूडवरही शोककळा पसरली. यावेळी रुग्णालयाबाहेर त्याच्या दु:खी चाहत्यांच्या उसळलेल्या जनसागराला आवरण्यासाठी पोलिसांना मोठी कसरत करावी लागली तसेच गर्दीला आवर घालण्यासाठी लाठीचार्ज करावा लागला.


दिग्गज नेत्यांची सोशल मीडियावरून श्रद्धांजली
पुनीतला देशातील अनेक दिग्गज राजकारण्यांनी सोशल मीडियावरून श्रद्धांजली वाहिली. यामध्ये पंतप्रधान नरेंद्र मोदी, काँग्रेस नेते राहुल गांधी आणि तामिळनाडूचे मुख्यमंत्री एम. के. स्टॅलिन यांनीही ट्विट करून अभिनेत्याच्या निधनाबद्दल शोक व्यक्त करत श्रद्धांजली वाहिली.

आतापर्यंत दहा जणांची आत्महत्या
पुनीतच्या अकाली निधनाचे वृत्त समजताच एका चाहत्याच्या एवढे जिव्हारी लागले की त्याने आत्महत्या केली. तर दोघांना हृदयविकाराचा झटका आल्याने त्यांचे निधन झाले. बेळगावातील शिंदोली गावातील परशुराम देमन्न यांचेही हृदयविकाराच्या झटक्याने निधन झाले. आतापर्यंत कर्नाटकमध्ये १० जणांनी आत्महत्या केल्याची प्रकरणे समोर आली आहेत.

चार जणांचे आयुष्य प्रकाशमान
पुनीतने ईश्र्वरा घरी जाताना अंधारलेल्या चार जणांचे जीवन तेजोमय केले. वडिलांप्रमाणेच त्याने नेत्रदानाचा संकल्प केला होता. त्याच्या इच्छेनुसार नेत्रदान करण्यात आले. यामुळे चार दृष्टिहिनांचे आयुष्यात प्रकाशमान झाले. नव्या तंत्रज्ञानानुसार डॉक्टरांनी २ कार्डियाचे चार भागात विभाजन करून ३ पुरुष व १ महिला अशा चार रुग्णांमध्ये कार्डिया ट्रान्सप्लांट केला. या सर्वांचे वय २० ते ३० दरम्यान होते. ते मागील सहा महिन्यांपासून कार्डिनाच्या प्रतिक्षेत होते. कोरोनामुळे नेत्रदान थांबले होते. मात्र, पुनीतने घेतलेल्या नेत्रदानाच्या निर्णयामुळे या सर्वांना नवी दृष्टी मिळाली.

हेही वाचा: मंजुनाथ शेट्टी ते मंजम्मा जोगती!

नेत्रदानासाठी चाहत्यांच्या आत्महत्या
पुनीतकडून प्रेरणा घेऊन काही चाहत्यांनी नेत्रदानासाठी आत्महत्या केली आहे. त्याच्या मृत्यूनंतर नेत्रदान करणाऱ्यांच्या संख्येत वाढ झाली आहे. कर्नाटकातील टुमकु येथील भरतने ३ नोव्हेंबर रोजी गळफास घेऊन आत्महत्या केली. त्यापूर्वी त्याने चिठ्ठीत लिहिले होते, 'मला अप्पूच्या मरणाचे दुःख सहन होत नाही. त्याच्या सोबत राहण्यासाठी मी आत्महत्या करीत आहे. त्याच्याप्रामाणे माझेही डोळे दान करावे.'

क्रीडा विश्‍वातून शोक व्यक्त
पुनीतच्या जाण्याने क्रीडाविश्वानेही शोक व्यक्त केला. माजी क्रिकेटर व्यंकटेश प्रसादने ट्वीट करून मनःपूर्वक संवेदना व्यक्त केली. त्याने चाहत्यांना शांतता राखण्याचे आवाहन केले. माजी फिरकीपटू अनिल कुंबळेने ही पुनीत राजकुमार यांच्या निधनाने धक्का बसला असून, टॉलीवूडमधील एक रत्न गमावले आहे. मला भेटलेल्या सर्वोत्कृष्ट माणसांपैकी एक मोठे व्यक्तीमत्त्व होते, असे त्याने नमूद केले.


हरभजन सिंगनेही ट्वीट केले आहे. तो म्हणाला, की पुनीत राजकुमार गेले, हे ऐकून धक्काच बसला. आयुष्य हे खूप अनपेक्षित आहे. त्यांच्या निधनाबद्दल ऐकून दु:ख झाले. तर पुनीतच्या मृत्यूने भारतीय चित्रपटसृष्टीमध्ये मोठी पोकळी निर्माण झाली आहे. त्याचे सामाजिक कार्य इतरांसाठी प्रेरणादायी आहे. त्याच्या आत्म्याला शांती लाभो, असे ट्वीट फलंदाज वीरेंद्र सेहवागने केले आहे.

पुनीतच्या पत्नीची भावुक पोस्ट
पुनीत यांची पत्नी अश्विनी हिने आपल्या पोस्टमध्ये लिहिले आहे की, मला चाहत्यांचे आभार मानायचे आहेत. पुनीत राज हे त्यांच्या चाहत्यांसाठी पॉवर स्टार होते. मी लाखो चाहत्यांची खूप खूप आभारी आहे. त्यांनी आम्हाला केलेल्या सहकार्याबद्दल, त्याला श्रद्धांजली वाहताना लाखोंचा समुदाय पाहताना आपण काही गमावले नाही....पुनीत त्यांच्या सामाजिक कार्याच्या माध्यमातून दृष्टिहिनांच्या दिलेल्या दृष्टीतून आपल्या सभोवतालीच आहे, याचा प्रत्यय कायम येत राहील.

पुनीतच्या कुटुंबीयांसाठी मृत्यू अनपेक्षित
पुनीत यांचा जन्म चेन्नई येथे १७ मार्च १९७५ रोजी झाला. लोहित असे खरे नाव असलेल्या पुनीतच्या पश्चात पत्नी अश्विनी रेवनाथ, दोन मुली द्रिथी आणि वंदिथा असा परिवार आहे. त्यांचा मोठा भाऊ शिवा राजकुमार प्रसिद्ध कलाकार आहे. वडील राजकुमार, आई पर्वतम्मा राजकुमार, भाऊ शिवा राजकुमार (अभिनेता आणि गायक), राघवेंद्र राजकुमार (चित्रपट निर्माता आणि अभिनेता), बहिण : लक्ष्मी व पौर्णिमा अशा मोठ्या कुटुंबामध्ये त्याचे व्यक्तिमत्त्व अतुलनीय होते. त्याने जगाचा घेतलेला अनपेक्षित निरोप हा सर्वांसाठी मोठा धक्का समजला जात आहे.

हेही वाचा: बहरलेल्या फळबागांचा धोरणकर्ता


अनेकांचा आधारवड हरपला

अनाथाश्रमे उभारण्यात आणि गरजू विद्यार्थ्यांच्या शिक्षणात पुनीतने सिंहाचा वाटा आहे. औदर्यामुळे पुनीतने अनेक अनाथ मुलांचे संगोपन केले. पण त्याने आजवर कुठेही स्वत:ला सामाजिक कार्यकर्ता म्हणून ओळख दाखवली नाही. कर्नाटकात २६ हून अधिक अनाथाश्रम, २५ शाळा, १९ गोशाळा, १८०० विद्यार्थ्यांना मोफत शिक्षण, १६ वृद्धाश्रमे उभारण्यासह त्यांना सर्व सुखसोई पुरवून अनेकांचे जीवन त्याने घडवले आहे.


पुनीतच्या सामाजिक कार्याची पोस्ट सोशल मीडियावर खूपच व्हायरल झाली. या अनाथांच्या राजाने सिनेमातून मिळणाऱ्या कमाईचा काही भाग वृद्धाश्रम, विद्यार्थ्यांसाठी नेहमीच राखीव ठेवला. त्यामुळे हा हिरो खऱ्या अर्थाने अनाथांचा कैवारी, राजा ठरला. त्याच्या निधनाने अनेकांचा आधारवड हरपला आहे. पुनीत हा अनाथाश्रमातील मुलांसाठीच काम करणारा म्हणून मर्यादित नव्हता, तर खऱ्या आयुष्यात देखील पुनीत 'राजा'सारखाच होता. हजारो विद्यार्थ्यांच्या मोफत शिक्षणाबरोबरच वृद्ध आणि अनाथांच्या पालनपोषणाचे काम त्याने केले आहे. समाजासाठी योगदान दिल्याचे कधीही उघड न करता, तो प्रामाणिकपणे जनसेवा करत होता.

हेही वाचा: राजकारणात ‘शहरं’ ठरताहेत प्रभावशाली!

पुनीतचे गाजलेले चित्रपट
पुनीत यांना अप्पू या नावाने ओळखले जाते. १९८० च्या दशकामध्ये बालकलाकार म्हणून चित्रपटांमध्ये दिसल्यानंतर पुनीत 'अप्पू' या चित्रपटातून मुख्य भूमिकेतून चित्रपटसृष्टीत पदार्पण केले. हा चित्रपट प्रचंड गाजला. २००२ मध्ये त्यास अप्पू ही ओळख मिळाली. त्याने १९७६ मध्ये कन्नड चित्रपट 'प्रेमदा कनिके'मध्ये लहान मुलाची भूमिका साकारून अभिनय कारकिर्दीला सुरुवात केली.


१९८५ मध्ये त्यास नॅशनल फिल्म अॅवॉर्ड मिळाला. त्याने काही कन्नड फिल्म प्रोड्युस केल्या. ‘अभी’, ‘वीरा कन्नडिगा’, ‘अजय’, ‘अरासु’, ‘राम’, ‘हुडुगारु’ आणि ‘अनजनी पुत्र’ यांसारख्या चित्रपटात तो झळकला आहे. ‘Yuvarathnaa’ या चित्रपट त्याच्यासाठी अखेरचा ठरला. याच वर्षी त्यांचा हा चित्रपट प्रेक्षकांच्या भेटीला आला आहे.


१९८५ मध्ये प्रदर्शित झालेल्या ‘बेट्टाडा हूवू’ चित्रपटातील अभिनयासाठी त्याला सर्वोत्कृष्ट बाल कलाकाराचा राष्ट्रीय चित्रपट पुरस्कार मिळाला आहे. तसेच ‘चालिसुवा मोडागलू’ आणि ‘येराडू नक्षत्रगलू’ या चित्रपटातील अभिनयासाठी त्यास कर्नाटक राज्याचा सर्वोत्कृष्ट अभिनयासाठी पुरस्कार मिळाला होता.

प्रेक्षकांच्या मनोरंजनाला प्राधान्य देणारा अभिनेता
पुनीत राजकुमार हा कन्नड चित्रपट उद्योगातील सर्वाधिक मानधन घेणारा अभिनेता होता. जेकब वर्गीस या दिग्दर्शकाने सांगितले की,
डॉ. राजकुमार यांचा सर्वात धाकटा मुलगा सर्वात जास्त मानधन घेत आहे. पुनीतने आपल्या महत्त्वाच्या कामगिरीला "अरेरे! मी अशा गोष्टींचा कधीच मागोवा घेतला नाही. तुम्ही मला विचाराल तर, मी सर्वात कमी मानधन घेणारा अभिनेता आहे." अधिक गंभीर टोन घेत, तो स्पष्ट करतो, "मला माझ्या आई आणि भावांचे आभार मानायला हवे. ज्यांनी मला इंडस्ट्रीमध्ये अशा प्रकारे ओळख दिली. आता असे लोक आहेत जे त्यांच्या चित्रपटांमध्ये दाखवण्यासाठी मला जास्त पैसे देण्यास तयार आहेत. मी येथे 'सर्वाधिक मानधन घेणारा अभिनेता' या संपूर्ण टॅगमध्ये नाही. माझे उद्दिष्ट फक्त माझ्या चाहत्यांचे मनोरंजन करणे आहे."

असे प्रेम क्वचित एखाद्याच्या वाट्याला
टॉलीवूडमध्ये ३० हून अधिक कन्नड चित्रपटांमध्ये भूमिका साकारल्यामुळे त्याच्या जाण्यामुळे मनोरंजन विश्‍वाला मोठा धक्का बसला. अभिनयासह पुनीतच्या सर्वांच्या लक्षात राहील तो त्याने दिलेल्या सामाजिक योगदानामुळे.


रियल हिरो अनंतात विलीन होऊन महिना उलटला असला तरी त्याच्या अभियानाचे गारूड टॉलीवूडच्या प्रेक्षकांच्या हृदयातून उतरले नाही. सामाजिक योगदानामुळे तो सर्वांच्या हृदय मंदिरात कायम देव बनून घर करून राहील. त्याच्यासारखा हिरो भविष्यात होईल की नाही याबाबत दाक्षिणात्य सिनेरसिकांमधून शंका उपस्थित केली जात आहे. अभिनय, औदार्य आणि सर्वांविषयी आपुलकीचा ओलावा जपणाऱ्या दिलदार हिरोबाबत 'न भूतो न भविष्यते...'असेच म्हणाले लागेल.

टॅग्स :Actortollywood
Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा.”
go to top