Cafe Culture and Human Connections
esakal
प्रतीक जाधव
कॅफे म्हणजे फक्त तरुणांचा हँगआउट पॉइंट ही व्याख्या आता पुसट झाली आहे, कारण मध्यमवयीन, उतारवयीन लोकसुद्धा मोठ्या संख्येनं कॅफेजकडे वळू लागले आहेत. कॅफेमध्ये एक टेबल तरुणांचं, तर त्याच्याच शेजारी दुसरं टेबल प्रौढांचं असं चित्र सर्रास पाहायला मिळू लागलं आहे. ‘जनरेशन गॅप’ ही संकल्पनाच जणू त्या
दोन टेबलांच्या मधल्या निमुळत्या गॅपमध्ये येऊन अदृश्य झाली आहे.
फर्स्ट क्लास कॉफी... अशी ऑर्डर दिल्यानंतर वेटरने ती कॉफी टेबलवर आणून ठेवावी; गप्पांची चव घेण्यात तासन्तास गेल्यानं कॉफीची आठवण ती पूर्णपणे थंड झाल्यावरच यावी आणि मग त्या थंड कॉफीचा प्रत्येक घोट पिताना ती आणखीनच चवदार लागावी... अशा अनुभूतीचं ठिकाण म्हणजे कॅफे! एका कॉफीवर जगातलं प्रत्येक सुख साजरं करणारी जागा म्हणजे कॅफे! चिलआउट स्पेस, हँगआउट स्पेस असं तुम्ही काहीही म्हणा, पण तिथं वाफाळत्या घोटांसोबत रंगणाऱ्या गप्पा तुमचं भावविश्व फुलवतात. काहीच मिनिटांच्या आउटिंगसाठी आलेलो आपण अनेकदा धुंदपणे बोलत राहतो. म्हणजे बघा ना, जर मोबाईल संवाद कमी करणारं ‘बायोटिक’ असेल, तर कॅफे संवाद वाढवणारं ‘अँटिबायोटिक’ आहे असं मला वाटतं.
