Pune : रस्ता खोदल्याने एक कोटीचा दंड

पुणे : पावसाळा जवळ आल्याने महापालिकेने रस्ते खोदाई बंद करून रस्ते दुरूस्तीवर भर दिलेला असताना बांधकाम व्यावसायिक, खासगी ठेकेदारांकडून परस्पर रस्ते खोदाई केल्याचे प्रकार समोर आला आहे. याप्रकरणी दोघांना ९२ लाख रुपयांचा दंड केला आहे.

महापालिकेतर्फे १ आॅक्टोबर ते ३० एप्रिल या कालवधीमध्ये जलवाहिनी, मल वाहिनी, गॅस वाहिनी, विद्युत वाहिनी, मोबाईल व इंटरनेट नेटवर्कसाठी केबल टाकण्यासाठी रस्ते खोदाईसाठी परवानगी दिली जाते.

यासाठी खासगी कंपनीकडून १२ हजार १९२ रुपये प्रति मिटर तर महावितरणच्या विद्युत वाहिनीसाठी २ हजार ३५० रुपये प्रति मीटर शुल्क घेतले आहे. महापालिकेला या शुल्कातून दरवर्षी किमान २५० कोटी रुपयांचे उत्पन्न मिळते. त्यातून जे रस्ते खोदलेले आहेत, तेथे दुरुस्ती केली जाते.

एक मे पासून शहरात रस्ते खोदाई बंद झाली आहे. पाणी पुरवठा व सांडपाणी वाहिनी यासह इतर अत्यावश्यक कामांसाठी खोदाईची परवानगी दिली जाते. असे असताना शहरात बांधकाम व्यावसायिक, खासगी ठेकेदार, मोबाईल कंपन्या रस्ते खोदत असल्याचे समोर आले आहे. अशांवर महापालिकेने दंडात्मक कारवाई केली आहे.

औंध डिमार्ट येथे एका बांधकाम व्यावसायिकाने रस्ते खोदाई केल्याप्रकरणी ४१ लाख ६९ हजाराचा दंड केला आहे. तर वडगावशेरी येथील खोदाईप्रकरणी एका खासगी ठेकेदाराला ५१ लाखाचा दंड केला आहे, अशी माहिती महापालिकेच्या पथ विभागाचे प्रमुख व्ही.जी. कुलकर्णी यांनी दिली.

फक्त तक्रार दंड नाही

सॅलिसबरी पार्क येथे एका मोबाईल कंपनीकडून केबल टाकली जात होती, याप्रकरणी कंपनीला दंड करणे अपेक्षीत होते. पण दंड न करता केवळ स्वारगेट पोलिस ठाण्यात तक्रार दिली आहे.दंड का केला नाही याबाबत अधिकाऱ्यांनी उत्तर देणे टाळले.