'पेन्शन आमच्या हक्काची, नाही कुणाच्या बापाची'' पिंपरीत अंगणवाडीताईंचे धरणे आंदोलन

पिंपरी : "पेन्शन आमच्या हक्काची, नाही कुणाच्या बापाची, अंगणवाडीताईला सन्मानाची वागणूक मिळालीच पाहिजे, सर्वांना पेन्शन मिळालीच पाहिजे,' अशा घोषणा देत मासिक पेन्शनच्या मागणीसाठी अंगणवाडीसेविकांनी सोमवारी (ता.11) धरणे आंदोलन केले. या आंदोलनात बदायूं अत्याचार घटनेचा निषेध नोंदविण्यात आला.

पिंपरीगावातील एकात्मिक बाल विकास प्रकल्प कार्यालयासमोर विविध मागण्यांच्या फलक हातात घेऊन अंगणवाडीसेविकांनी धरणे धरले. ऍड. मोनाली चंद्रशेखर अपर्णा व कल्याणी दुर्गा रवींद्र यांच्या डफलीच्या ठेक्‍यावर सेविका मंदा मोरे यांनी ध्येय गीतातून अंगणवाडीसेविकांच्या समस्या कथन केल्या. अंगणवाडी कर्मचारी सभा, महाराष्ट्र संलग्न व अंगणवाडी कर्मचारी कृती समितीचे पुणे जिल्हाध्यक्ष नितीन पवार यांनी आंदोलनाचे नेतृत्व केले.

दादां’नो, आता शहराकडे लक्ष घालाच!

पवार म्हणाले, "क्रांतिज्योती सावित्रीबाई फुले यांच्या जयंतीच्या निमित्ताने राज्यात रोज वेगवेगळ्या ठिकाणी प्रामुख्याने धरणे आंदोलन करण्याचा निर्णय घेतला आहे. तसेच नुकतेच बदायूं - उत्तर प्रदेश येथे ज्येष्ठ अंगणवाडीसेविकांवर मंदिरातील पुजारी व साथीदारांनी अनन्वित अत्याचार करून निर्घृण खून केला. म्हणून अत्याचार करणाऱ्या नराधमांना कठोर शासन करा व अंगणवाडी ताईंच्या कुटुंबाचे पुनर्वसन करण्याची मागणी आहे.

या आहेत अंगणवाडीच्या मागण्या
पिंपरी चिंचवड अंगणवाडी कर्मचारी संघटनेच्या अध्यक्षा शैलजा चौधरी म्हणाल्या, "गेल्या 2 -3 वर्षांपासून निवृत्त झालेल्या किंवा मयत अंगणवाडी कर्मचाऱ्यांचा थकीत सेवा समाप्ती लाभ त्वरित अदा करण्यात यावा.''
 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा
 

मालती किरदत्त म्हणाल्या, "एकरकमी सेवा समाप्ती लाभ कायम ठेवून त्या व्यतिरिक्त सेविका मदतनिसांना त्यांच्या शेवटच्या मानधनाच्या निम्मी रक्कम मासिक पेन्शन स्वरूपात तहहयात देण्यात यावी.''

उर्वशी गाढवे म्हणाल्या, "भविष्यात कर्मचाऱ्यांच्या मानधनात वाढ झाल्यास पेन्शनमध्ये त्या वाढीच्या निम्म्या रकमेची वाढ करण्यात यावी.''

वाकड ब्रिजजवळील खासगी ट्रॅव्हल्स व ट्रकचा भीषण अपघात; एकाचा मृत्यू

शमा सय्यद म्हणाल्या, "प्रकल्पाच्या पाया झालेल्या मात्र शासन आदेशात कालावधी निश्‍चित केल्याने निवृत्तीनंतरचे लाभ न मिळालेल्या अंगणवाडी ताईंनाही निवृत्तीनंतरचे लाभ दिला पाहिजे.''

सुशीला सराटे म्हणाल्या, " ज्येष्ठ अंगणवाडीताईंवर अत्याचार केलेल्या नराधमांना शासन केले पाहिजे.''