कोरोना संसर्गापासून बालकांना वाचविण्यासाठी गोवरच्या लसीचा फायदा

पुणे - कोरोना संसर्गापासून (Corona Infection) बालकांना (Child) वाचविण्यासाठी गोवरच्या लसीचा (Measles Vaccine) फायदा (Benefit) होत असल्याची बाब तुलनात्मक संशोधनातून (Research) पुढे आली आहे. पुण्यातील बालरोग तज्ज्ञांनी केलेले हे संशोधन ह्यूमन वॅक्सिन्स अँड इम्युनोथेरपीटिक्स या शोधपत्रिकेत प्रकाशित झाले आहे. (Benefits of Measles Vaccine to Protect Children from Corona Infection)

बालरोगतज्ज्ञ डॉ. निलेश गुजर यांनी बी.जे.वैद्यकीय महाविद्यालयाच्या सहकार्याने केला आहे. महाविद्यालयाचे अधिष्ठाता डॉ. मुरलीधर तांबे, डॉ.मालनगोरी परंडे यांचा या संशोधनात सहभाग असून, जगातील अशा प्रकारचे हे पहिलेच संशोधन असल्याचे डॉ.गुजर यांनी सांगितले. टेस्ट निगेटिव्ह केस कंट्रोल पद्धतीचा वापरातून गोवर, एमआर, एमएमआर लसींची कोरोना विरुद्ध ८७.५ टक्के परिणामकारकता सिद्ध झाली आहे.

असे झाले संशोधन :

- एक ते १७ वयोगटातील ५४८ मुलामुलींची अध्ययनासाठी निवड

- पुणे महापालिका क्षेत्रातील या बालकांची दोन गटात विभागणी

- कंट्रोल आणि अनकंट्रोल अशा गटातील बालकांच्या लसीकरणाची माहिती मिळविण्यात आली

- त्यांच्या कोरोनाच्या आरटी-पीसीआर चाचणी नंतर मिळालेल्या माहितीच्या आधारे निष्कर्ष काढण्यात आले.

कोरोनाच्या तिसऱ्या लाटेच्या पार्श्वभूमीवर हे निष्कर्ष निश्चितच आश्वासक आहे. प्रत्यक्ष वैद्यकीय चाचण्या घेऊन अधिक खातरजमा शास्रज्ञानी करायला हवी. जो पर्यंत बालकांना प्रत्यक्ष कोरोनाची लस मिळत नाही तो पर्यंत ही लस महत्वपूर्ण भूमिका बजावेल.

- डॉ. निलेश गुजर, बालरोगतज्ज्ञ