Video : ग्रहणानंतर आंघोळ करता यावी म्हणून...; पुण्यात नगरसेविकेची अजब मागणी!

पुणे : सूर्यग्रहण असो किंवा चंद्रग्रहण, ग्रहण म्हटलं की श्रद्धा-अंधश्रद्धा आल्याच. त्या पाळणं, न पाळणं ही वैयक्तिक गोष्ट. हिंदू धर्मात तर ग्रहणकाळात अमुक-अमुक गोष्ट वर्ज्य करावी, याची एक यादी बनेल.  पण ग्रहण आहे म्हणून एखादं शासकीय काम थांबवणं, हे स्वीकारणं थोडं जड जातं. असाच काहीसा प्रकार पुणे महानगरपालिकेत घडला.

- ताज्या बातम्यांसाठी डाऊनलोड करा ई-सकाळचे ऍप

हिंदू धर्मात ग्रहण काळ समाप्तीनंतर स्नान करण्याची परंपरा आहे. त्यामुळे त्या दिवशी पाणीपुरवठा बंद राहिल्यास नागरिकांची मोठी गैरसोय होईल. हे टाळण्यासाठी पाणीपुरवठा विभागाने गुरुवारनंतर दुसऱ्या एखाद्या दिवशी देखभाल-दुरुस्तीचे काम करावे, आणि पाणीपुरवठा ग्रहण काळ संपेपर्यंत नेहमीप्रमाणे सुरू ठेवावा, अशी अजबगजब मागणी पुणे महानगरपालिकेतील भारतीय जनता पक्षाच्या एका नगरसेविकेने केली आहे.

- Video : 'सीएए के सम्मान में, पुणेकर मैदान में'; शहरात विविध ठिकाणी मानवी साखळी!

येत्या गुरुवारी (ता.26) देशभरात सूर्यग्रहण दिसणार आहे. ते संपल्यानंतर नागरिकांना अंघोळ करावी लागते. त्यामुळे गुरुवारी होणारं पाईपलाईन दुरुस्तीचं काम पुढे ढकलण्यात यावे, अशी मागणी भाजप नगरसेविका मंजुश्री खर्डेकर यांनी केली. आपण ही मागणी नागरिकांच्या विनंतीवरून केल्याचे सांगायला त्या विसरल्या नाहीत.  

- पुण्यात काही ठिकाणी रिमझिम पाऊस; हवामान खातं म्हणतं...

गेल्या काही महिन्यांपासून महिन्यातील प्रत्येक गुरुवारी शहराचा पाणीपुरवठा बंद ठेवला जातो. या दिवशी पाणीपुरवठा देखभाल दुरुस्तीचे कामकाज केले जाते. मात्र, गुरुवारीच सूर्यग्रहण येत असल्याने हे काम पुढे ढकलावे. या दिवशी पाणीपुरवठा बंद राहिला आणि दुसऱ्या दिवशी कमी दाबाने किंवा अपुरा पाणीपुरवठा झाला, तर शहरातील नागरिकांची मोठी गैरसोय होईल, अशी शक्यता खर्डेकर यांनी व्यक्त केली.

या मागणीचे निवेदन त्यांनी महापौर मुरलीधर मोहोळ आणि सभागृह नेते धीरज घाटे यांना दिले आहे. त्यामुळे महानगरपालिका प्रशासन काय निर्णय घेते हे पाहणं औत्सुक्याचं ठरणार आहे.    

- पुण्यातही होणार अटलजींचा भव्य पूर्णाकृती पुतळा

पुणे शहर हे 'विद्येचे माहेरघर' आहे. नरेंद्र दाभोळकर आणि त्यांच्यासारखे अनेक सामाजिक कार्यकर्ते आजही अंधश्रद्धा निर्मूलनाचे काम करत आहेत. मात्र, नगरसेविकेसारख्या जबाबदार व्यक्तीने अशा प्रकारची मागणी केल्याने अनेकांच्या भुवया उंचावल्या आहेत.