तरुणांनो सावधान! ऑनलाईनच्या जाळ्यात 'ती' तुम्हाला अडकवतेय

पुणे - देशाच्या विविध भागांतून नोकरी, व्यवसाय किंवा शिक्षणासाठी पुण्यात आलेले तरुण एकाकीपणा घालविण्यासाठी तरुणींशी ‘ऑनलाइन डेटिंग’ करतात. मात्र त्यातून त्यांची फसवणूक होत असल्याचे प्रकार घडत आहे. शहरात आतापर्यंत बत्तीसहून अधिक तरुणांना डेटिंगमधून गंडा घातल्याच्या प्रकाराला सामोरे जावे लागले आहे.

ताज्या बातम्यांसाठी डाऊनलोड करा ई-सकाळचे ऍप

बंगळूरमधून नोकरी व्यवसायानिमित्त पुण्यात राहणाऱ्या करणची ऑनलाइन डेटिंगद्वारे एका तरुणीशी ओळख झाली. त्याने तिला भेटायचे ठरविले; पण तिने भेटण्यापूर्वी वेगवेगळी कारणे सांगून करणकडून ५० ते ६० हजार रुपये घेतले. त्यानंतर करणने तिला संपर्क केला, मात्र ती त्याला कधीच भेटली नाही... अशा पद्धतीने ‘ऑनलाइन डेटिंग’द्वारे तरुणांची फसवणूक होत आहे.

केवळ मुख्यमंत्रिपदासाठी सेनेने भगव्याशी तडजोड केली : गडकरी

पुणे शहरात नोकरी, उद्योग, व्यवसाय, शिक्षण इत्यादींसाठी देशाच्या विविध भागांतील तरुण येतात. त्यांना दररोजच्या धकाधकीच्या जीवनात काहीसे वेगळे व शांत राहण्याची इच्छा होते. त्या वेळी एकाकी आयुष्य जगणाऱ्या या तरुणांची इंटरनेटवर डेटिंग साईट, मोबाईल ऍप्लिकेशन आणि फेसबुकद्वारे तरुणींशी ओळख होते. त्यानंतर भेटण्याच्या नावाखाली तरुणींकडून तरुणांना फसविले जात असल्याचे गुन्हे सायबर पोलिसांकडे दाखल झाले आहेत.

धनंजय मुंडेची जागा रिक्त; 'या' नेत्याला मिळणार संधी

पैशांची गरज असल्याचे भासवून या तरुणी तरुणांकडून पैसे उकळत आहेत. मोफत डेटिंगच्या आमिषाने तरुणांची फसवणूक होत असल्याचे प्रकार घडत आहेत. काही प्रकारांमध्ये तरुणांची वैयक्तिक माहिती, छायाचित्रे, व्हिडीओ घेतली जाते. त्यानंतर फोटो, व्हिडिओचे मॉर्फींग करून त्या आधारे संबंधीत तरुणांना ब्लॅकमेल करण्याचेही प्रकार घडतात. तसेच त्यांना शिवीगाळ करून जिवे मारण्याच्या धमक्‍या देण्याचेही प्रकारही घडत असल्याचे पोलिसांच्या माहितीमध्ये पुढे आले आहे. ऑनलाइन डेटिंगच्या प्रकारामध्ये बिहार, उत्तर प्रदेश, दिल्ली, पश्‍चिम बंगाल यासारख्या राज्यांमधून काही टोळ्या सक्रिय आहेत. त्यांच्याकडून तरुणांची फसवणूक केली जाते.

शहरातील एकाकी तरुण डेटिंग साईटवर जाऊन जोडीदार शोधतात. मात्र अनेकदा अनोळखी व्यक्ती तरुणांची वैयक्तिक माहिती घेऊन, कधी भावनिक, तर ब्लॅकमेल करून पैसे उकळतात. त्यामुळे तरुणांनी अशा घटनांबाबत पोलिसांना तत्काळ माहिती द्यावी.
- जयराम पायगुडे, वरिष्ठ पोलिस निरीक्षक, सायबर पोलिस ठाणे.

शहरामध्ये मागील वर्षभरात डेटिंगप्रकरणी दाखल झालेल्या गुन्ह्यांतून तरुणांची फसवणूक झाल्याचे निष्पन्न झाले. त्याची  गांभीर्याने दखल घेऊन ४३ जणांना आम्ही अटक केली आहे.
- संभाजी कदम, पोलिस उपायुक्त, आर्थिक व सायबर गुन्हे शाखा.

४३ जणांना अटक 
पुणे पोलिसांच्या सायबर पोलिसांनी डेटिंगच्या फसवणूक प्रकरणात ३२ गुन्ह्यांमध्ये ४३ जणांना अटक केली. त्यांची सखोल चौकशी करून या स्वरुपाचे गुन्हे नियंत्रणात आणण्यासाठी पोलिसांकडून प्रयत्न सुरू आहे.