Pune News : दोन PMPML बसमध्ये सापडून कंत्राटी कामगाराचा जागीच मृत्यू; कात्रजमधील घटनेने परिसरात हळहळ

कात्रज, ता. ११ : दोन पीएमपीएल बसमध्ये सापडून कंत्राटी कर्मचाऱ्याचा मृत्यू झाल्याची घटना मंगळवारी (ता. ११) दुपारी कात्रज चौकात घडली. कात्रज जुन्या बसस्थानकाजवळ पीएमपीची बस तांत्रिक कारणामुळे बंद पडली होती. ती बस टोइंग करून काढण्यासाठी गेलेल्या कंत्राटी कामगाराचा जागीच मृत्यू झाला.

गणेश गुजर (वय ४२) रा. कोथरूड, मुळ गाव भोर असे मृत्यू झालेल्या कर्मचाऱ्यांचे नाव आहे. गुजर हे कंत्राटी मकॅनिक कामगार म्हणून कात्रज आगारात काम करत होते. कात्रज हिंजवाडी बस बंद पडल्याने ती बस दुसऱ्या बसद्वारे टोईंग करुन बाजूला घेत होते. बस बाजूला घेताना टोईंग करण्यासाठी लावलेला रॉड सुटून दोन बसमध्ये सापडून कर्मचाऱ्याचा जागीच मृत्यू झाला.

ही दुर्घटना घडताच भारती विद्यापीठ पोलीस स्टेशनचे व वाहतूक विभागाचे कर्मचारी घटनास्थळी दाखल होत मृतदेह ताब्यात घेऊन पुढील तपासणीसाठी ससून येथे पाठवण्यात आला आहे. अधिक तपास भारती विद्यापीठ पोलीस करत आहेत. बस बंद पडलेली असताना पीएमपीएल प्रशासनाने ती बस टोईंग व्हॅनने टोईंग न करता बसणे का टोईंग केली? टोईंग करताना योग्य ती काळजी का घेण्यात आली नाही? असा प्रश्न नागरिकांकडून यानिमीत्ताने उपस्थित करण्यात येत आहे.