हवेली तालुक्यातील रुग्ण म्हणतात, कोणी बेड देता का बेड...

लोणी काळभोर (पुणे) : हवेली तालुक्यातील उरुळी कांचन, लोणी काळभोर, मांजरी बुद्रुकसह पूर्व हवेलीमधील कोरोनाबाधित रुग्ण व रुग्णांच्या संपर्कात आलेले जवळचे (हायरिस्क) नातेवाईक, अशा शंभरहून अधिक जणांना मागिल तीन दिवसांपासून उपचारासाठी बेड उपलब्ध होत नाहीत. त्यामुळे रुग्ण व नातेवाईकांची अवस्था अतिशय दयनीय झाली आहे. त्यामुळे कोरोनाबाधित रुग्ण व नातेवाईकांनी लोकप्रतिनिधी व आरोग्य विभागाकडे उपचारासाठी कोणी बेड देता का बेड, अशी हाक मारण्यास सुरुवात केली आहे. 

अमोल कोल्हे यांच्या पंचसूत्रीचे पालन करा...कोरोनाला दूर रोखा....

जिल्हाधिकारी नवल किशोर राम यांच्या आदेशानुसार आरोग्य विभागाने दहा दिवसांपूर्वी हवेली तालुक्यातील विविध बारा खासगी रुग्णालयातील सतराशेहून अधिक बेड अधिगृहीत करण्यात येणार असल्याची घोषणा केली होती. मात्र, सतराशे बेड अधिग्रहीत करण्यात आल्याची घोषणा दहा दिवसानंतरही हवेतच फिरत आहे. पूर्व हवेलीतील एकाही खासगी रुग्णालयाने कोरोनाबाधित रुग्णासाठी बेड उपलब्ध करून दिले नसल्याची धक्कादायक बाब पुढे आली आहे.

दौंडमधील या कुटुंबातील सहा जणांचे कोरोनाचे रिपोर्ट...

दरम्यान, कोरोनाबाधित रुग्णाला एकीकडे उपचारासाठी बेड उपलब्द होत नाही, तर दुसऱ्या बाजुला कोरोना पॉझिटिव्ह असल्याचे शेजाऱ्या-पाजऱ्यांना समजल्याने घरीही थांबता येत नाही. त्यामुळे कोरोनाबाधित रुग्ण व नातेवाईकांची दुहेरी कुचंबना होत आहे.  त्यातच खासगी रुग्णालयात उपचाराचे पैसे पेड करण्याची तयारी दाखवूनही बेड शिल्लक नसल्याचे सांगत उपचार करण्यास नकार देत आहेत. त्यामुळे नाईलाजास्तव उपचाराविना घरीच रहावे लागत असल्याची गंभीर बाब मागिल तीन दिवसात पुढे आली आहे. त्यामुळे पूर्व हवेलीत कोरोनाचा प्रादुर्भाव कमी होईल, ही आशा मावळली आहे. 

जुन्नरमधील कोरोनाबाधितांसाठी एक हजार बेडची व्यवस्था

पूर्व हवेलीमधील कोरोना रुग्णांची वाढती रुग्ण संख्या लक्षात घेऊन प्रशासनाने दहा दिवसांपूर्वी विश्वराज (लोणी काळभोर), चिंतामणी (उरुळी कांचन), प्रयागधाम (कोरेगाव मूळ), शिवम (कदमवाकवस्ती) या रुग्णालयांसह काही खासगी रुग्णालयातील एकूण बेडसंख्येच्या ८० टक्के बेड कोरोनाबाधित रुग्णांसाठी जिल्हा परिषदेच्या ताब्यात घेत असल्याची घोषणा केली होती. मात्र, त्यानंतर अद्यापही वरील एकाही रुग्णालयाने आरोग्य विभागाच्या बेड ताब्यात दिलेले नाहीत. त्यामुळे कोरोनाबाधित रुग्णांना बेड उपलब्द होत नाहीत. मागिल तीन दिवसाचा विचार केल्यास, पूर्व हवेलीमधील रुग्ण व त्यांच्या संपर्कात आलेल्या जवळच्या नातेवाईकांना होम आयसोलेशनसाठी बेड उपलब्द होत नाहीत. त्यामुळे शंभरहून अधिक जण वेंटिंगवर आहेत.  

पुण्याच्या इतर बातम्या वाचण्यासाठी येथे क्लिक करा

याबाबत हवेली पंचायत समितीचे आरोग्य अधिकारी डॉ. सचिन खरात म्हणाले की, पूर्व हवेलीमधील रुग्णांना पुरेसे बेड मिळत नाही, ही वस्तुस्थिती आहे. यातुन मार्ग काढण्यासाठी वरिष्ठ पातळीवर प्रयत्न सुरु आहेत. खासगी रुग्णालयातील बेड पुढील एकदोन दिवसात मिळतील, अशी अपेक्षा आहे. वाघोली येथील जैन कॉलेज व लोणी काळभोर येथील एमआयटी संस्थेची वसतिगृह ताब्यात घेण्याबाबच चर्चा चालू आहे. वाघोली येथील वसतिगृहात दोनशेहून अधिक रुग्णांची सोय होणार आहे. तर, एमआयटी संस्थेच्या वसतिगृहात चारशेहून अधिक रुग्णांची सोय होऊ शकते. 

पूर्व हवेलीत कोरोनाबाधित रुग्ण व त्यांच्या संपर्कात आलेल्या जवळच्या नागरिकांना पुरेसे बेड उपलब्ध होत नसल्याने रुग्ण व नातेवाईक अशा शंभरहून अधिक जणांची दयनीय अवस्था झाल्याची चर्चा कानावर आली आहे. जिल्हा परिषदेचे आरोग्य अधिकारी व शल्यचिकीत्सक अधिकारी यांच्यात ताळमेळ नसल्यानेच वरील परिस्थिती निर्माण झालेली आहे, ही वस्तुस्थिती नाकारून चालणार नाही. याबाबत आजच पालकमंत्री अजितदादा पवार व जिल्हाधिकारी यांच्याशी बोलणार आहे. तसेच, पुढील चोविस तासात परिस्थितीत कसा फरक पडेल, याकडे लक्ष देणार आहे.
 - डॉ. अमोल कोल्हे, 
खासदार  

Edited by : Nilesh Shende