मुळशीतील शेतकऱ्यांवर वादळामुळे दुबार पेरणीचे संकट, पिकांचे, घरांचे नुकसान

पौड  : चक्रीवादळामुळे मुळशी तालुक्याच्या पश्चिम पट्ट्यातील अनेक गावांमध्ये घर, झाडे, विजेच्या पोलचे अतोनात नुकसान झाले. त्यामुळे तालुक्यातील पश्चिम पट्टा सध्या अंधारात आहे. अनेक शेतकऱ्यांची खाचरे पाण्याने तुडूंब भरल्याने भाताच्या दुबार पेरणीचे संकट बळीराजावर ओढवले आहे. नैसर्गिक आपत्तीमुळे झालेल्या नुकसानीचे पंचनामे करून शेतकऱ्यांना नुकसान भरपाई मिळावी, अशी मागणी ग्रामस्थांनी केली आहे. 
 

चक्रीवादळाने हिरावला पुणे जिल्ह्यातील शेतकऱ्यांचा घास 

पुणे आणि रायगडची सिमा दर्शविणाऱ्या फलकाची कमान आदरवाडी येथे ढासळली. त्याचप्रमाणे आदरवाडी, डोंगरवाडी, निवे, सारोळे, वांद्रे, पिंपरी, गोठा, सुसाळे, भांबर्डे, घुटके, बार्पे, वांद्रे, वाघवाडी, शिरगाव या गावांना वादळाचा मोठा फटका बसला. येथील विजेचे पोल, झाडे उन्मळून पडली. घरांवरील पत्रे उडून गेले. भिंतींनाही चिरा पडल्या. बार्पे तिस्करी येथे बारा घरे उडून गेली. वाघवाडीला प्राथमिक शाळेच्या इमारतीचा काही भाग कोसळला. भादसखोंडा येथे बंद असलेल्या चार घरांचे छत उडून गेले.

पुणे जिल्ह्यात चक्रीवादळाने असा घातलाय हाहाकार

माले येथे आठ घरांचे छप्पर उडाले. वळणे येथील विजेचे खांब पडले. तसेच, झाडाच्या फांद्याही घरावर पडल्या. आंबवणेकडे जाणाऱ्या मुख्य रस्त्यावर झाड पडले. जामगाव येथेही मोठ्या कष्टाने लावलेली आंब्याची झाडे उन्मळून पडली. घरांचीही पडझड झाली. मांदेडे येथे माजी सरपंच शिवाजी वीर यांचा म्हशीचा गोठा कोसळून एक पारडू दगावले. येथील काही शेतकऱ्यांच्या घरांचे नुकसान झाले. आंदेशे, बेलावडे, कोंढावळे, खेचरे, चिंचवड या भागातील आंब्याची झाडे पडली. काही झाडाला लगडलेले आंबेही पडले. त्याचप्रमाणे विजेचे खांब पडल्याने हे संपूर्ण खोरेच अंधारात आहे.
    

पुण्यातील धरण क्षेत्रात किती पाऊस, वाचा सविस्तर

पौड येथेही मुख्य रस्त्यावरील फ्लेक्स कोसळला. जनावरांच्या दवाखाना असलेल्या भागातील मोठ मोठी झाडे उन्मळून पडली. दारवलीमार्गे भरेकडे जाणाऱ्या रस्त्यावर विजेचे खांब पडले. अंबडवेटला संजय ढमाले यांच्या तीन पॉलिहाउसचे छप्पर वाऱ्याने उडून गेले. रावडे, खुबवली, असदे, भादस, संभवे या भागातही बहुतांश शेतकऱ्यांच्या घराला तडा गेला. शेताच्या बांधावरील झाडे उन्मळून पडली. कोळवण खोऱ्यातील करमोळी, सावरगाव, चाले, दखणे, मुगावडे या भागातील घरांचे नुकसान झाले. तर काशिग, कोळवण, भालगुडी, हाडशी, वाळेण, साठेसाई, कोळवण, डोंगरगाव, नांदगाव, चिखलगाव, होतले, कुळे, नाणेगाव या गावांतून काही शेतकऱ्यांच्या घराचे छप्पर उडाले.

भुकूम : वादळामुळे मुळशी तालुक्‍यातील भुकूम, आंदगाव व खारवडे येथे मोठे नुकसान झाले. भुकूम येथे घराची भिंत पडून सखाराम खाटपे (रा. खाटपेवाडी) हे जखमी झाले. उपचारासाठी त्यांनी रुग्णालयात दाखल केले आहे. या ठिकाणी नऊ घरांचे पत्रे उडून गेले असून, त्यांचे पंचनामे करण्यात आल्याचे ग्रामविकास अधिकारी अनिल बोराटे यांनी सांगितले. खारवडे व आंदगाव परिसरात देखील घरांचे पत्रे उडाले. अनेक ठिकाणी विजेचे खांब वाकल्याने वीज पुरवठा खंडित झाला आहे. यामुळे या गावांचा पाणी पुरवठा बंद झाला आहे. तसेच या भागांमध्ये झाडे उन्मळून पडली असून आंब्याचे देखील नुकसान झाले. वादळामुळे खारवडे येथे घरांचे पत्रे, कौले उडून मोठे नुकसान झाले. तसेच, विजेचे खांब अनेक ठिकाणी वाकले आहे. त्यामुळे गावाचे पाणी बंद झाले आहे. घरांची नुकसान भरपाई मिळावी, अशी मागणी सरपंच लक्ष्मण मारणे यांनी केली आहे. खारावडे येथे चौदा कुटूंबाच्या घरांचे पत्रे उडून भिंती खचल्या आहेत. येथील धोंडिबा नवस्कर, रामभाऊ आखाडे, लक्ष्मण आखाडे यांच्या घरांचे पत्रे उडून मोठे नुकसान झाले. तसेच, रस्त्यवरील अनेक विजेचे खांब वाकून तारा लोंबकळत आहेत. येथील पाणी योजनी बंद पडली असून टंचाई निर्माण झाली आहे.