डीएसकेंच्या 23 ठेवीदारांचा मृत्यू

पुणे : ठेवींवर चांगला परतावा मिळतोय म्हणून आयुष्याची पुंजी बांधकाम व्यावसायिक डी. एस. कुलकर्णी (डीएसके) यांच्याकडे गुंतविणारे ठेवीदार आता आपले पैसे मिळावे म्हणून जिवाचा आकांत करीत आहेत. दुर्दैवाची बाब म्हणजे, राज्यभरातील सुमारे 23 ठेवीदारांचा गेल्या दोन वर्षांत विविध कारणांमुळे मृत्यू झाला आहे.

ताज्या बातम्यांसाठी डाऊनलोड करा ई-सकाळचे ऍप 

मृत्यू झालेल्यांच्या नावांची यादीच ठेवीदारांच्या संघटनेमधील प्रतिनिधींनी तयार केली आहे. मृत्यू झालेल्यांपैकी काही ठेवीदार या प्रकरणांच्या सुनावणीवेळी न्यायालयातदेखील हजर राहत होते. तर आजारपण, मुला-मुलींचे लग्न, घराचे बांधकाम अशा विविध कारणांसाठी त्वरित पैसे मिळावेत म्हणून अनेकांची न्यायालयीन लढाई सुरूच आहे. या प्रकरणात डीएसके, त्यांची पत्नी हेमंती, मुलगा शिरीष, भाऊ मकरंद, पुतणी, जावई, मेव्हणी यांच्यासह काही नातेवाईक आणि बॅंक ऑफ महाराष्ट्रच्या वरिष्ठ अधिकाऱ्यांना अटक करण्यात आली होती. त्यातून बॅंकेच्या अधिकाऱ्यांना या गुन्ह्यातून वगळण्यात आले आहे. तर, मुख्य आरोपींसह इतरांनी जामिनासाठी केलेला अर्ज न्यायालयाने फेटाळला आहे. डीएसके यांनी 35 हजार गुंतवणूकदार आणि बॅंकांची सुमारे 3 हजार कोटी रुपयांची फसवणूक केली, असा ठपका त्यांच्यावर ठेवण्यात आला आहे.

येस बँक प्रकरणात राणा कपूर यांच्या मुलीही आल्या अडचणीत!

म्हातारपणी न्यायालयाची पायरी 
डीएसके यांच्याकडे गुंतवणूक केलेल्यांमध्ये सर्वसामान्यांपासून व्यावसायिक, सरकारी अधिकारी आणि नोकरदारांचा समावेश आहे. अनेक वर्षे चांगला परतावा मिळत गेल्याने यातील अनेकांनी आपले सर्व पैसे केवळ डीएसके यांच्याकडे गुंतविले होते. मात्र, डीएसके यांच्या अटकेनंतर या सर्वांना मोठा धक्का बसला असून, उतारवयात कोणतीही चूक नसताना आपल्या हक्काच्या पैशांसाठी न्यायालयाची पायरी चढण्याची नामुष्की त्यांच्यावर ओढवली आहे.

पुण्याच्या रश्मी ऊर्ध्वरेषे यांना मिळाला ‘नारीशक्ती’ पुरस्कार

पैसे न मिळाल्याने आत्महत्या
मुलीच्या लग्नासाठी डीएसकेंकडे गुंतविलेले पैसे परत मिळत नसल्याने तानाजी गणपत कोरके (वय 60) यांनी जानेवारीमध्ये राहत्या घरी गळफास घेऊन आत्महत्या केली होती. आत्महत्येपूर्वी लिहिलेल्या चिठ्ठीत त्यांनी आत्महत्येसाठी डीएसके यांना जबाबदार ठरविले आहे. कोरके यांनी मुलींच्या मुलांच्या शिक्षणासाठी 50 हजार रुपये डीएसके डेव्हलपर्सकडे गुंतविले होते.

ताज्या बातम्यांसाठी डाऊनलोड करा ई-सकाळचे ऍप 

हे प्रकरण लवकर निकाली लागून पैसे मिळावेत, अशी आमची इच्छा आहे. गुंतवणूकदारांमध्ये 75 टक्‍क्‍यांहून अधिक ज्येष्ठ नागरिक आहेत. काही ठेवीदारांकडे आता आजारपणालादेखील पैसे नाहीत, अशी स्थिती आहे. आत्तापर्यंत मृत्यू झालेल्या 23 ठेवीदारांची माहिती आमच्याकडे आहे. हा आकडा जास्तही असू शकतो.
- ठेवीदारांच्या संघटनेचे प्रतिनिधी

पुण्याच्या बातम्या वाचण्यासाठी येथे ► क्लिक करा

• सुमारे 23 ठेवीदारांचा मृत्यू
• डीएसकेंना जबाबदार ठरवत एकाची आत्महत्या
• आत्तापर्यंत 13 जणांना अटक
• 35 हजार गुंतवणूकदारांची फसवणूक
• फसवणुकीचा आकडा तीन हजार कोटी