कडूस (पुणे) : कोरोनाच्या उपचाराकरिता खासगी रुग्णालये अवाजवी बिले आकारीत असल्याच्या तक्रारींनंतर खेड तालुक्यात दक्षता समितीची स्थापना करण्यात आली. या समितीवर फक्त शासकीय अधिकारी व कर्मचाऱ्यांचा समावेश आहे. समितीचे कामकाज पारदर्शकपणे होण्यासाठी या समितीवर तालुक्यातील सामाजिक संस्थांच्या सदस्यांना प्रतिनिधीत्व मिळावे, अशी मागणी तालुक्यातील सामाजिक संस्थांनी केली आहे.
खेड तालुक्यात कोरोनाने थैमान घातले आहे. रुग्ण संख्या दिवसेंदिवस वाढत आहे. तालुक्यातील रुग्ण संख्या दोन हजाराच्या जवळ गेली आहे. रुग्ण संख्या जास्त असल्याने उपचारासाठी खासगी रुग्णालयांचा आधार घ्यावा लागत आहे. कोरोनाच्या धास्तीने नागरिक घाबरले आहेत. अगोदरच घाबरलेल्या रुग्णांना व नातेवाईकांना आणखी भीती दाखवून अवाजवी बिले थोपवण्याचे प्रकार खेड तालुक्यात सुरू आहेत.
याबाबत तक्रारी येऊ लागल्यानंतर खेडच्या प्रांताधिकाऱ्यांनी तहसीलदार सुचित्रा आमले यांच्या नेतृत्वाखाली चांडोली (राजगुरूनगर), चाकण, आळंदी ग्रामीण रुग्णालयाचे वैद्यकीय अधीक्षक व तालुका वैद्यकीय अधिकाऱ्यांचा समावेश असलेल्या दक्षता समितीची स्थापना केली. ही समिती वैद्यकीय देयकांवर नियंत्रण ठेवणार आहे व तक्रारींची चौकशी करणार आहे. परंतु, या समितीत सामाजिक संस्थांच्या सदस्यांना प्रतिनिधित्व मिळायला हवे, अशी मागणी खेड तालुका ग्राहक हक्क समितीने केली आहे.
समितीच्या म्हणण्यानुसार या दक्षता समितीत फक्त शासकीय अधिकारी आहेत. त्यात डॉक्टर अधिक आहेत. समव्यवसायिक (डॉक्टर) एकमेकांना पाठीशी घालण्याचा प्रकार होत असतो. हा प्रकार इथे होऊ नये व समितीच्या कामकाजात पारदर्शकता येण्यासाठी समितीत स्थानिक सामाजिक संस्थेच्या सदस्यांना प्रतिनिधी म्हणून सहभागी करून घेतले पाहिजे. तालुका ग्राहक हक्क समितीच्या सदस्याचा समितीत सहभाग करावा, अशी मागणी खेड तालुका ग्राहक हक्क समितीचे अध्यक्ष रंगनाथ सुतार, मानद सचिव विद्याधर साळवे व सदस्यांनी केली आहे.
याबाबत ग्राहक हक्क समितीचे किरण भालेकर म्हणाले की, खेड तालुका ग्राहक हक्क समिती गेली तीस वर्षे गाव ते राज्य पातळीपर्यत ग्राहकांच्या हितासाठी काम करीत आहे. विविध प्रकारच्या समस्या समितीकडे येत असतात. त्यात प्रामुख्याने वैद्यकीय क्षेत्रातील तक्रारींचे प्रमाण लक्षणीय आहे. कोरोना उपचारासंदर्भात शासनाने दर निश्चित केले आहेत. परंतु खासगी दवाखाने अवाजवी बिले आकारीत आहे. या संदर्भात प्रशासनाने स्थापन केलेल्या समितीचे निःपक्षपाती व पारदर्शक कामकाज व्हायला हवे. यासाठी ग्राहक हक्क समितीच्या दोन सदस्यांना दक्षता समितीवर प्रतिनिधित्व मिळायला पाहिजे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.