निवडणूक ग्रामपंचायतीची अन् पंचक्रोशीत चर्चा रंगली आजीबाईंची!

मुंबादेवी (पुणे) : पुणे जिल्ह्यातील विविध तालुक्यात शुक्रवारी (ता.१५) ग्रामपंचायतीच्या विविध प्रभागांसाठी मतदान प्रक्रिया पार पडली. ग्रामपंचायत पंचवार्षिक निवडणुकीसाठी मतदान संपन्न होताना नव मतदारांत पहिल्याच मतदानाचा उत्साह दिसून येत होता.

पुणे जिल्ह्यातील जुन्नर तालुक्यातही हाच उत्साह दिसत होता. सकाळी साडेसात ते संध्याकाळी साडेपाचपर्यंत झालेल्या मतदानात नागरिकांनी  उत्साहात सहभाग घेत आपले मतदानाचे राष्ट्रीय कर्तव्य पार पाडले. जुन्नर तालुक्यातील काटेडे या गावी ग्रामपंचायतीच्या झालेल्या निवडणुकीत एकूण तीन प्रभागील सात जागांसाठी मतदान होणार होते, परंतु यात तीन जागांवर उमेदवारांची बिनविरोध निवड झाल्याने उरलेल्या जागांसाठी मतदान प्रक्रिया पार पडली. 

- 'भाजप कोरोनापेक्षा अधिक धोकादायक'; नुसरत जहाँ यांच्या विधानावर भाजप भडकली​

निवडणूक ग्रामपंचायतीची असली तरी चर्चा मात्र रंगली ती ८७ वर्षीय आजीबाईंची. चंद्रभागा कोंडाजी चिलप यांनी अंथरुणाला खिळल्या असतानाही आपली मतदान करण्याची इच्छा त्यांचे पुत्र ग्रामपंचायत कर्मचारी दत्तात्रय चिलप यांच्याकडे व्यक्त केली. आपल्या आईच्या इच्छेला मान देत दत्तात्रय यांनी आईला खुर्चीवर बसवून वाहनातून मतदान केंद्रावर नेलं आणि तेथे आजीबाईंनी हसतहसत मतदान केले. आणि त्यांना पुन्हा घरी सुखरूप आणले. मतदान करणे हे प्रत्येक नागरिकाचे कर्तव्य असून ते माझ्या आईने अंथरुणाला खिळले असतानाही पार पाडल्याचा एक वेगळाच आनंद मला होत आहे, अशी भावना दत्तात्रय यांनी 'सकाळ'शी बोलताना व्यक्त केली.

- Breaking : पुण्यातील सहकारी बॅंकेवर 'ईडी'चा छापा; कसून सुरूय झाडाझडती!​

विशेष म्हणजे या आजीबाईंची नात दीक्षिता चिलप या आजी अंथरुणाला खिळल्याचे समजताच सुट्टीवर आलेल्या आहेत. त्या पुणे येरवडा कारागृहात शिपाई पदावर कार्यरत असून त्यांनीही मतदाराचे कर्तव्य पार पाडले. आजीबाईंनी अशा परिस्थितीतही मतदान केल्याचे कळताच ग्रामस्थांनी आजीबाईंच्या या निर्णयाचं कौतुक केलं. कर्तव्यावर हजर असलेले पोलिस कर्मचारी आणि मतदान केंद्रातील अधिकारी-कर्मचारी यांनीही आजीबाईंच्या या इच्छेचं कौतुक करीत मतदान न करणाऱ्यांसाठी आजींनी एक आगळावेगळा पायंडा घालून दिला आहे, असं म्हटलं आहे.

- पुण्याच्या बातम्या वाचण्यासाठी येथे ► क्लिक करा

(Edited by: Ashish N. Kadam)