Pune Accident News : कोथरुड परिसरात मद्यधुंद मोटारचालकाची वाहनांना धडक

Pune Accident : कोथरूड परिसरात कर्वे रस्त्यावर शनिवारी मध्यरात्री मोटारचालकाने चार ते पाच वाहनांना धडक दिल्याची घटना घडली. या अपघातात दोघेजण किरकोळ जखमी झाले आहेत. मोटारचालक मद्यधुंद अवस्थेत असल्याचा आरोप प्रत्यक्षदर्शींनी केला असून, त्याचा व्हिडिओ सोशल मीडियावर प्रसारित झाला आहे.

पोलिसांनी दिलेल्या माहितीनुसार, कर्वे रस्त्यावरील सुखकर्ता डायनिंग हॉलसमोर मध्यरात्री बारा वाजण्याच्या सुमारास भरधाव मोटारीने चार ते पाच वाहनांना धडक दिली. या अपघातात दोघांना दुखापत झाली आहे. त्यांना खासगी रुग्णालयात उपचार करुन सोडण्यात आले. पोलिसांनी चौकशीसाठी मोटारचालकाला ताब्यात घेतले आहे.

या संदर्भात परिमंडळ तीनचे पोलिस उपायुक्त सोहेल शर्मा यांनी दिलेल्या माहितीनुसार, मोटारचालकाने मद्य सेवन केल्याचा संशय आहे. त्याच्या रक्ताचे नमुने तपासणीसाठी घेण्यात आले आहेत. पोलिसांनी मोटारचालकाचा जबाब घेतला असून, त्याच्याविरुद्ध गुन्हा दाखल करण्यात येणार आहे.