Breaking : पुण्यातील आणखी एका तालुक्यात कोरोनाची एन्ट्री; पहिलाच रुग्ण अन् तोही पॉझिटिव्ह!
दौंड : महाराष्ट्रात कोरोना विषाणूची बाधा झालेला पहिला रूग्ण ९ मार्च रोजी पुणे येथे आढळून आला होता. त्यानंतर तब्बल ५१ दिवस उलटल्यानंतर दौंड तालुक्यातील दहिटणे येथे बुधवारी (ता.२९) कोरोना बाधित रुग्ण आढळून आला आहे. दहिटणे येथील ७० वर्षीय ज्येष्ठ नागरिकास कोरोना विषाणूची लागण झाली आहे.
दौंड तालुका आरोग्य अधिकारी डॉ. अशोक रासगे यांनी आज या बाबत माहिती दिली. सदर ज्येष्ठ नागरिकाच्या मुलाला पुणे येथील ससून सर्वोपचार रूग्णालयात ४ ते ८ एप्रिल दरम्यान यकृताचा तीव्र त्रास होत असल्याने उपचारार्थ दाखल करण्यात आले होते. मात्र, त्या मुलाचा मृत्यू झाला; त्यानंतर ज्येष्ठ नागरिकास २० एप्रिल रोजी त्रास होऊ लागल्याने प्रथम राहू (ता.दौंड) प्राथमिक आरोग्य केंद्रात प्रथमोपचार करण्यात आले. घशाचा अधिक त्रास होत असल्याने सदर ज्येष्ठ नागरीकास २५ तारखेला पुणे येथे पाठविण्यात आले होते. त्यांचा वैद्यकीय अहवाल आज प्राप्त झाला असून कोरोना पॉझिटिव्ह असल्याचे निदान झाले आहे. त्यांच्यावर पुणे येथे उपचार सुरू आहेत.
पुणे शहरापासून ४५ किलोमीटर अंतरावर असलेले दहिटणे गाव राहू बेटात आहे. कोरोनाची बाधा झालेल्या या ज्येष्ठ नागरिकाच्या संपर्कात आलेल्या व्यक्तींची वैद्यकीय तपासणी करण्यासह दहिटणे गावाच्या आठ किलोमीटर परिघातील गावांमध्ये अति खबरदारी घेत वैद्यकीय तपासण्या केल्या जाणार आहेत, अशी माहिती डॉ. रासगे यांनी दिली.
दौंड तालुक्यात २० मार्चपासून लॅाकडाउन पाळला जात आहे. तालुक्यात आतापर्यंत १० हजार ३१७ नागरिकांना होम क्वॉरंटाइन करण्यात आले होते. त्यापैकी ९६८१ नागरिकांचा क्वॉरंटाइन कालावधी पूर्ण झाला आहे. दौंड तालुक्याशेजारील बारामती, लोणी काळभोर, उरूळी कांचन आदी शेजारील तालुक्यांमध्ये कोरोना बाधित आढळल्यानंतर २८ ते ३० एप्रिल दरम्यान दौंड शहरासह तालुक्याच्या अनेक गावांमध्ये पुन्हा जनता कर्फ्यू काटेकोरपणे पाळला जात आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.