कोरोना निदानाच्या शुल्काला राज्य सरकारने लावली कात्री; चाचणीचे दर निम्म्यावर!

पुणे : खासगी प्रयोगशाळांमधील कोरोना संसर्गाच्या रोगनिदान चाचणीच्या शुल्काला राज्य सरकारने कात्री शनिवारी (ता.१३) कात्री लावली. त्यामुळे साडेचार हजार रुपयांना होणारी चाचणी आता रुग्णालयात २ हजार २०० रुपयांना होईल, अशी माहिती राज्याचे आरोग्य मंत्री राजेश टोपे यांनी दिली.

- पाऊस डोक्यावर असताना पुण्यातील 900 कुटुंबांच संसार उघड्यावर

रुग्णाची कोरोना निदानासाठी रुग्णालयात नमूने घेतले तर त्या चाचणीचा खर्च २ हजार २०० रुपये आकारण्यात येईल. तर, रुग्णाच्या घरी जाऊन नमूने संकलित केल्यास त्या शुल्कात ६०० रुपये वाढ होईल. त्यामुळे रुग्णाच्या घरी जाऊन नमूने घेण्याचा खर्च आता २ हजार ८०० रुपये निश्चित केला आहे. राज्यात यापूर्वी खासगी वैद्यकीय प्रयोगशाळांमधून साडेचार हजार रुपये रोगनिदान चाचणीसाठी आकरण्यात येत होते. यात राज्य सरकारने आता सुमारे निम्म्याने दर कमी केले आहेत. 

- कोरोनामुळे जिम व्यवसायिकांच्या अडचणीत वाढ

खासगी प्रयोगशाळेतील कोरोना रोगनिदान चाचणीच्या शुल्कात कपात करण्यात येणार असल्याचे सर्वप्रथम वृत्त ‘सकाळ ‘ने ९ मे रोजी प्रसिद्ध केले होते. या शुल्क पुनर्रचनेचा विचार करण्यासाठी सरकारने एक स्वतंत्र समिती स्थापन केली होती. त्याचा अहवाल दोन दिवसांपूर्वी तयार होऊन सरकारकडे पाठविण्यात आला होता. त्या बाबत आरोग्य मंत्र्यांनी आज अंतिम निर्णय घेतला.  
हे शुल्क निश्चित करताना समितीने प्रयोगशाळेतील वीज बिलापासून ते डॉक्टरांच्या वेतनापर्यंत सर्व घटकांचा विचार केला आहे. रुग्णाचा घेतलेला स्वाब प्रयोगशाळेपर्यंत आणण्यासाठी रिएजंट आणि लिक्विड लागते.

- पुण्यात भूमीपुत्रांना नोकरीची संधी

तसेच, प्रत्यक्ष तपासणीसाठी रोगनिदान किट आवश्यक असते. याच बरोबर पीपीई (पर्सनल प्रोटेक्शन इक्विपमेंट किट) अत्यावश्यक आहे. अशा प्रत्येक घटकाच्या किंमतीवर समितीमध्ये अभ्यास करण्यात आला. प्रत्येक चाचणीची साडेचार हजार रुपये शुल्क निश्चित केले तेव्हा रिएजंट परदेशातून आयात करत होतो. ते आता देशात उत्पादन होत आहे. त्यासाठी वेगवेगळ्या कंपन्या पुढे आल्या आहेत. त्यामुळे त्याचे दर आता कमी झाल्याने कोरोना रोगनिदान चाचणीचे शुल्कदेखील कमी करण्यात आले आहे. 

- बा विठ्ठला, यंदा पंढरीची वारी चुकू दे हरी

निश्चित केलेल्या दरापेक्षा जास्त शुल्क आकारल्यास खासगी प्रयोगशाळांवर कारवाई केली जाईल, असेही टोपे यांनी स्पष्ट केले आहे. राज्यात कोरोनाचे निदान करणाऱ्या ८३ प्रयोगशाळा असून त्यापैकी ५० प्रयोगशाळा सरकारी तर, ३३ खासगी प्रयोगशाळा आहेत. 

- ताज्या बातम्यांसाठी डाऊनलोड करा ई-सकाळचे ऍप 

- पुण्याच्या बातम्या वाचण्यासाठी येथे ► क्लिक करा