हुश्श, पुण्यातील हे धरण लवकरच भरणार
चास (पुणे) : खेड तालुक्‍यासह आंबेगाव तालुक्‍याच्या सातगाव पठार भागाला वरदान ठरणाऱ्या खेड तालुक्यातील कळमोडी धरणात 86.54 (1.31 टीएमसी) पाणीसाठा झाला आहे. धरण भरण्याच्या मार्गावर आहे.
खेड तालुक्‍यात पावसाने जेमतेम हजेरी लावली असल्याने कळमोडी धरण भरण्याच्या मार्गावर असल्याने हाच काय तो दिलासा आहे. हे धरण भरल्यावर यातून विसर्ग होणारे पाणी चासकमान धरणात येते. त्यामुळे चासकमान धरणाच्या पाणीसाठ्यात वाढ होण्यास मदत होणार असल्याची माहिती धरणाचे शाखा अभियंता उत्तम राऊत यांनी दिली आहे.
खेड तालुक्‍याच्या पश्‍चिम पट्ट्यात आरळा नदीवर असलेले कळमोडी धरण हे 1.54 टीएमसी क्षमतेचे आहे. खेड तालुक्यातील चासकमान धरणाच्या पाण्यापासून वंचित राहिलेले क्षेत्र व आंबेगाव तालुक्यातील सातगाव पठार भागासाठी वरदान ठरणारे हे धरण आहे. धरण कायम जुलै महिन्यातच ओव्हरफ्लो होते. मात्र, चालू वर्षी धरणाच्या पाणलोट क्षेत्रातील भोमाळे, परसूल, घोटवडी, कुडे या परिसरात पावसाचा जोर जेमतेम राहिले. त्यामुळे धरणाच्या पाणीसाठ्यात कासवगतीने वाढ होते आहे. तरीही पावसाचा जोर असाच राहिल्यास दोन दिवसांत धरण ओव्हरफ्लो होण्याची शक्‍यता आहे.
कळमोडी धरण भरल्यावर या धरणातून बाहेर पडणारे पाणी चासकमान धरणात येते. त्यामुळे धरणातील पाणीसाठा वाढण्यास मदत होणार आहे. धरणस्थळावर रोहिदास नाईकडे, सुदाम सावंत, बाबाजी शिंदे, संभाजी बोंबले, बाळासाहेब नाईकडे हे कर्मचारी पाण्याच्या साठ्यावर चोवीस तास लक्ष ठेवून आहेत.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.