Pune BRT : ‘बीआरटी’तील घुसखोरी ३० हजार चालकांना भोवली; सहा महिन्यांत १९ लाखाचा दंड वसूल

पुणे - ‘बीआरटी’मध्ये घुसखोरी करणे सुमारे ३० हजार वाहनचालकांना भोवले. त्यांच्यावर वाहतूक पोलिसांनी कारवाई केली आहे. केवळ बीआरटीमधून वाहन चालविणे एवढेच नाही. तर त्यांच्यावर विमा पॉलिसी नसल्यानेही कारवाई झाली. यात सुमारे १९ लाख रुपयांचा दंड वसूल करण्यात आला.

बीआरटीमधील वाहनचालकांची घुसखोरी पीएमपीची डोकेदुखी बनली आहे. पीएमपी प्रशासनाकडे वॉर्डन नसल्याने घुसखोरी करणाऱ्यांवर कारवाई होत नव्हती. मात्र गेल्या काही महिन्यांत पीएमपी प्रशासनाने वाहतूक पोलिसांना कारवाई करण्याची विनंती केली. त्यानुसार पिंपरी चिंचवड शहरातील बीआरटीमधून जाणाऱ्या खासगी वाहनांवर वाहतूक पोलिसांनी दंडात्मक कारवाई केली.

ऑक्टोबर २२ ते मार्च २३ दरम्यान वाहतूक पोलिसांनी सुमारे ३० हजार वाहन चालकांवर दंडात्मक कारवाई केली असून त्यांच्याकडून १८ लाख ८३ हजार ८५० इतका दंड वसूल करण्यात आला आहे. अशीच कारवाई पुणे शहरातदेखील सुरू असून त्याचा आकडा पीएमपी प्रशासनाकडे अद्याप उपलब्ध झालेला नाही.

बीआरटीमधून प्रवास करण्याची परवानगी केवळ रुग्णवाहिका व अग्निशामक दलाच्या गाड्यांनाच आहे. अन्य वाहनांना नाही, मात्र दुचाकीचालक सर्रास बीआरटी मार्गावरून जातात. याचा परिणाम पीएमपीच्या बस संचलनावर होतो. याशिवाय अपघाताचाही धोका निर्माण होतो.

- अनंत वाघमारे, बीआरटी व्यवस्थापक, पीएमपीएमएल, पुणे