Pune Ganeshotsav : तंदुरुस्त बंदोबस्तासाठी पोलिसांना चिक्की वाटप

खडकवासला - उत्तमनगर येथील जनसेवा उत्कर्ष स्वयंसहाय्यता बचत गट संघ यांच्यावतीने उत्तमनगर पोलिस ठाण्यातील अधिकारी- कर्मचारी वर्गाला चांगला तंदुरुस्त बंदोबस्त करण्यासाठी आज शनिवारी चिक्की वाटप केली. संघाच्या वतीने गेली १० वर्षे हा उपक्रम राबविला जात आहे.

उत्तमनगरचे पोलिस निरीक्षक किरण बालवडकर यांच्याकडे बचत गट संघाचे अध्यक्ष सुरेश गुजर यांनी चिक्की सुपूर्त केली. यावेळी काही कर्मचाऱ्यांना प्रातिनिधिक स्वरुपात चिक्की वाटप केली. यावेळी बचत गट संघाचे उपाध्यक्ष दत्तात्रय वाघ, खजिनदार अंबादास धर्मकांबळे, सचिव सदाशिव लोले, मनीषा कांबळे, सचिन घुमे, अंकुश तिडके, राजू धोत्रे, एड.शंकर जाधव हे संचालक मंडळ उपस्थित होते.

गणेशोत्सव निर्विघ्न पार पडावा, म्हणून पोलिस सतर्क असतात. परिणामी त्यांना जास्त वेळ बंदोबस्त करावा लागतो. बंदोबस्तावरील पोलिस तंदुरुस्त राहण्यासाठी पौष्टिक आहार म्हणून बचत गट संघाने उत्तम दर्जाची चिक्की वाटप केली. असे पोलिस निरीक्षक किरण बालवडकर यांनी सांगितले.

‘या काळात पोलिसांना जादा बंदोबस्त असतो. विसर्जन मिरवणुकीला देखील जास्त वेळ थांबावे लागते. त्यामुळे, पोलिसांच्या आरोग्याची हेळसांड होते. बंदोबस्तासाठी आरोग्य चांगले असले पाहिजे. म्हणून योग्य आहाराबरोबर चिक्की असल्यास बंदोबस्ताचा ताण कमी होण्यास मदत होते. म्हणून हा उपक्रम ‘सकाळ माध्यम समूहाने’ सुरू केला होता. हा स्तुत्य उपक्रम आम्ही बचत गट संघाच्या वतीने गेली १० वर्षे हा उपक्रम राबवितो. असे बचत गट संघाचे अध्यक्ष सुरेश गुजर यांनी सांगितले.