पुणे-नाशिक राष्ट्रीय महामार्ग खड्ड्यांत

पुणे - पुणे-नाशिक राष्ट्रीय महामार्गावर (Pune Nashik National Highway) एकलहरे, कळंब ते नारायणगाव या दहा किलोमीटर अंतरात ८० ठिकाणी मोठमोठे खड्डे (Pit) पडले असून हे खड्डे अपघाताला निमंत्रण देणारे ठरत आहेत. खड्ड्यांमुळे वाहनांचा (Vehicle) खोळंबा होत असल्याने वाहनचालक त्रस्त झाले आहेत. त्यामुळे या रस्त्याची त्वरित दुरुस्ती करावी अशी मागणी प्रवासी करत आहेत.

पुणे-नाशिक राष्ट्रीय महामार्गावर टेम्पो, एसटी, ट्रेलर आदी दहा ते १५ हजाराहून अधिक वाहनांची वर्दळ असते. कळंब येथे घोडनदीच्या पुलाजवळ, महाळुंगे फाटा, वर्पेमळा, महानुभवमळा, ४२ मैल, कळंब कॉलनीजवळ व हुतात्मा बाबू गेनू सागर डाव्या कालव्या नजीक पुलावर खड्डे पडले आहेत. त्यातच नारायणगावाहून कळंबकडे येताना उतार असल्याने वाहनांचा वेग अधिक असतो. एकलहरे परिसरात जवळपास ३० ते ३५ खड्डे आहेत. दिवसेंदिवस खड्ड्यांचा आकार वाढत चालला आहे.

या मार्गावरून प्रवास करताना वाहन चालकांना कसरत करावी लागत आहे. खड्डे चुकविताना वाहन दुसऱ्या लेनमध्ये जात आहेत. त्यामुळे रस्त्यावरून ये-जा करणाऱ्या पादचाऱ्यांनादेखील त्याचा त्रास सहन करावा लागत आहे.